Prokuroria e Posaçme SPAK ka dërguar për rigjykim dosjen lidhur me të penduarin e drejtësisë, Nuredin Dumani, si edhe të shumëkërkuarin Talo Çela, të cilët akuzohen si drejtues të një grupi kriminal, i cili në vitin 2020 shkoi në vrasjen e dy vëllezërve Besmir dhe Viktor Haxhia, si edhe të shtetasve Anxhelo Avdia dhe Dorjan Shkoza, në Durrës.
Ka qenë Gjykata e Posaçme GJKKO, ajo e cila e pati refuzuar fillimisht kërkesën e SPAK në maj 2022. Arsyeja ishte qartësimi i kontradiktave midis dëshmive të bashkëpunëtorëve të drejtësisë, Dumanit dhe Klevis Allës. Të dy personat kanë rrëfyer në Polici rrethana të njëjta vrasjesh, sa i takon ekzekutimit të vëllezërve Haxhia. Por, ata përfshinin persona të ndryshëm në ngjarje. Alla, është ai i cili ka inkriminuar Talo Çelën për këtë ngjarje.
Teksa, Dumani, e ka marrë vetë përsipër ngjarjen, duke përfshirë në të edhe Henrik Hoxhajn, si bashkëpunëtor. Por, Alla, është tërhequr nga dëshmia e tij disa javë më parë dhe kjo gjë i hap rrugën një rigjykimi të dosjes, pasi vetëm versioni i Dumanit mbetet në këmbë. Verifikimet e kryera, sipas SPAK, treguan se gjatë 2020 kulmuan kontradiktat mes Nuredin Dumanit dhe Talo Çelës, të cilët kishin bashkëpunuar fillimisht si drejtues të grupit të vrasësve me pagesë, e më pas ishin ndarë në dy grupe, duke prodhuar dy vrasjet. Gjykata e Posaçme do të shqyrtojë kërkesën e SPAK për marrjen e tyre të pandehur në datën 30 Maj.
