Informacionet se i shumëkërkuari Suel Çela, djali i një biznesmeni të njohur, po fshihet në Elbasan, bënë që specialet të fusnin sot si në ‘shtetrrethim’ qytetin dhe të zbarkonin në Tregun Ushqimor. RENEA shoqëron 4 persona te tregu Agroushqimor, operacioni në vijim. Tregu është në pronësi të fisit Çela. Më konkretisht të Petrit Çelës, babai i Suel Çelës.
Ky i fundit aktualisht është në kërkim nga SPAK, se ka porositur vrasje të kundërshtarëve tek killeri i penduar Nuredin Dumani dhe implikohet në dosjen “Plumbi i artë”. Nuk dihen ende se kush janë të arrestuarit, teksa priten më shumë detaje në vijim.
Si ndodhi përplasja e vitit 2017 dhe “Plumbi i artë”
Në 2017 te tregu u përplas makina e ish-shefit të policisë, Gjergj Oshafi. Përplasja në Tregun Agro-Ushqimor ndodhi në 18 shtator të 2017-së në Elbasan. Në atë kohë policia e Elbasanit kishte informacion për një grup të rrezikshëm që po lëvizte në qytet prandaj organizoi kontrolle. Pikërisht para tregut Agro-Ushqimor Policia ndaloi një Range-Rover ku brenda tij ishin Enea Bekteshi e Kelmend Xhaferri. Uniformat blu të Elbasanit i arrestuan dy të rinjtë për shkak se kundërshtuan punonjësit. Mirëpo, në momentin që policët po largoheshin, një Audi i blinduar vjen drejt makinave të uniformave blu dhe në këtë moment përplasen me njëra-tjetrën. Sipas Prokurorisë Policia ishte në aksion dhe Audi ka goditur me qëllim makinën e Gjergji Oshafit. Në dosje theksohet se Audin e blinduar e drejtonte Suel Çela i cili më pas u fut brenda Tregu Agro-Ushqimor. Dera e tregu u mbyll dhe Policia nuk mund të hynte dot në brendësi, për shkak se roja nuk e hapi portën. Kur Policia u fut brenda tregut, sipas Prokurorisë, Suel Çela ishte larguar. Për ngjarjen Çela doli i papërlyer sipas hetimeve, por edhe miqtë e tij që e mbuluan ia hodhën pa u lagur apo me dënime modeste.
