Njeri më i pasur në botë, Elon Musk, ka mohuar një raport të gazetës amerikane “Wall Street Journal” që pretendonte se ai kishte patur një lidhje me Nicole Shanahan, gruan e bashkëthemeluesit të Google, Sergey Brin.
Shefi ekzekutiv i prodhuesit të makinave elektrike Tesla postoi të hënën një shkrim në median sociale Twitter duke hedhur poshtë pretendimin se ai kishte qënë në një lidhje me Shanahan si “trillim total”, duke shtuar se ai dhe Brin ishin ende miq.
Duke cituar burime të paidentifikuara, WSJ raportoi në fundjavë se Musk, dhjetorin e vitit të kaluar, ishte angazhuar në një lidhje të shkurtër me Shanahan. Gazeta pretendonte se afera e kishte shtyrë Brin të bënte kërkesë për divorc nga Shanahan në janar dhe i kishte dhënë fund miqësisë së gjatë të miliarderëve të teknologjisë.
Musk shkroi në Twitter se ishte në një festë me Brin të dielën dhe se nuk kishte “asgjë romantike” mes tij dhe Shanahan.
Në një postim të mëvonshëm në Twitter për më shumë se 100 milionë ndjekësit e tij, Musk shkroi se ai kishte “humbur numërimin” sa herë WSJ kishte publikuar artikuj kundër tij.
Në një postim të mëvonshëm, Musk shkroi se WSJ duhet të transmetojë histori që “në të vërtetë kanë rëndësi për lexuesit e tyre dhe kanë bazë të qëndrueshme faktike”.
Brin paraqiti kërkesë për divorc duke përmendur “ndryshime të papajtueshme”, shkruante Journal, duke cituar të dhënat që tha se ishin depozituar në gjykatën e lartë të Qarkut Santa Clara. Brin është anëtar bordi në kompaninë mëmë të Google, Alphabet, dhe është njeriu i tetë më i pasur në botë me një pasuri prej 94.6 miliardë dollarësh. Musk është njeriu më i pasur në botë dhe ka një pasuri prej 242 miliardë dollarësh.
Në raportin e saj, WSJ tha gjithashtu se Brin udhëzoi këshilltarët e tij për të shitur investime personale në kompanitë e Musk pasi ai mori vesh për këtë çështje. Gazeta vijoi më tej duke shkruat se nuk ishte në gjendje të përcaktonte se sa të mëdha ishin ato investime, as nëse ishin bërë ndonjë shitje.
Pretendimi i WSJ u publikua ndërsa Musk përballet me një betejë gjyqësore mbi përpjekjet e tij për të përfunduar blerjen prej 44 miliardë dollarësh të Twitter.
Kompania Twitter dëshiron të detyrojë Musk të vazhdojë me një transaksion të rënë dakord që vlerëson kompaninë me 54.20 dollarë për aksion. Musk u largua nga marrëveshja këtë muaj, duke përmendur shqetësimet për numrin e llogarive falso në platformën e mediave sociale.
a.m/dita
