EMRAT: Kanë pasuri marramendëse, kush janë deputetët miliarderë të Parlamentit të ri

Shqipëria mund të vijojë të kryesojë listën e vendeve të varfra në Evropë, por jo të gjithë njohin këtë anë të vendit tonë. Ajo është Shqipëria e ‘popullit’, e rrogëtarëve dhe e 1 milionë personave që jetojnë në familje që nuk mund të përballojnë të paktën shtatë nga trembëdhjetë kategoritë e privimit (këtu mund të përmendim vonesat në pagesat e kredisë ose të qirasë për banesën kryesore, shpenzimet për shërbimet bazë, blerjet me këste ose pagesa të tjera të kredive të marra apo pamundësinë për të përballuar shpenzimet për pushimet vjetore një javë larg nga shtëpia si dhe pamundësia për të përballuar një shpenzim të paparashikuar financiar me vlerën 30.000 lekë të reja).

Por, ka dhe një Shqipëri tjetër, e atyre që kanë në duar taksat e këtyre të ‘varfërve’, që vulosin ligje, por që vetë mund të themi pa frikë se zotërojnë pasuri të frikshme.

E pavarësisht akuzave të njëpasnjëshme me të cilat mund të jenë përballur, nuk janë ‘tutur’ aspak që t’i fshehin pronat. E vetmja ‘lëvizje’ që mund të kenë bërë është kalimi i ndonjë prone si trashëgimi tek fëmijët, që në fund të fundit, flet mirë për ta si prindër.

Open Data, ka rreshtuar sot pasuritë e 50 deputetëve që pritet të betohen në Kuvend në shtator. ZËRI ka publikuar një listë me emra deputetësh, të majtë e të djathtë, që kanë llogari marramendëse të mbushura me para e valuta të huaja, ndërsa në ekrane flasin për taksa, për rritje çmimesh, shtrëngojnë duart me biznesin e vogël përpara zgjedhjeve dhe kërkojnë votat e qytetarëve.

E shumë prej tyre nuk janë stepur t’i futen as botës së biznesit.

Përmendim këtu Agron Malajn. E ka nisur karrierën e tij si Drejtor Rajonal i OSHEE-së Burrel, por paralelisht ka themeluar dhe Global Security Sh.p.k, kompaninë e sigurisë private, e cila është kthyer në një nga më të përhapurat në vend. Në vitin 2019, Malaj u bë kryebashkiak i Matit, por tashmë pret të zërë ulësen në Kuvend si një prej deputetëve më të kamur. Dhe kjo, falë biznesit që zyrtarisht sot e drejton vëllai i tij, Fatos Malaj.

 

Arkend Balla, një nga emrat më të lakuar në zgjedhjet e 11 majit ka në llogari bankare plot 2.3 miliardë lekë, ose më saktë 230,207,998.00 ALL. A ka nevojë të shtojmë prona të tundshme dhe të patundshme për të kuptuar nivelin e pasurisë që zotëron Balla?

 

Mirela Kumbaro është e radhës. Ajo i është futur politikës me një sërë pronash, që siç duket vijon t’i gëzojë ende. Ndryshime të vogla shohim vetëm në llogaritë bankare.

Socialistja Elisa Spiropali është gjithashtu një nga personat që në familje duket se timonin e ekonomisë ia ka lënë bashkëshortit, Salarjon Totaj, i cili zotëron një biznes në një nga zonat më të njohura, në rrugën “Abdi Toptani” dhe vetëm në vitin 2023 ka deklaruar afro 40 milionë lekë të ardhura nga ky aktivitet.

Vullnet Sinajt mjafton t’i përmendin thjesht emrin! Të gjithë e dinë tashmë që pas tij vjen rrjeti i “Big Market”, biznese, prona dhe një llogari prej 84,478,626.48 ALL. Lista e pasurive të tij nuk ka vërtet një fund, por ne po ju listojmë vetëm disa prej tyre.

Bledi Çuçi, me këto që shohim, nuk ka qenë kurrë i varfër! I është futur politikës duke pasur prona e llogari bankare, dhe jo, nuk janë pakësuar! Madje nëse shohim dhe të ardhurat e bashkëshortes së tij, Delina Fico, duket se situata për të ka qenë gjithmonë shumë mirë, aq sa edhe djalit, Endit, i kanë mundësuar një jetë me mjaft të mira materiale.

Me bizneset e bashkëshortit Artan Gaçi, deputetja Olta Xhaçka mund të renditet si një prej socialisteve më të pasura, edhe pse jo pak herë, kanë shkelur dhe në dyert e SPAK si familje!

Emrin e Tom Doshit mund ta barazojmë fare mirë me fjalën biznes. Çfarë spikat në deklaratat e bëra ndër vite janë shoqëri të shumta biznesesh si në Shqipëri dhe jo vetëm. Siç duket, fokusi i tij nuk ka qenë asnjëherë karrigia në Kuvend, por ka ditur mjaft mirë të lundrojë në botën e shifrave. Nuk mund të mos përmendim faktin që prioritet u ka kushtuar edhe fëmijëve, pasi llogaritë e tyre nuk kanë qenë ndonjëherë të zbrazura.

Duke qenë se me socialistët mbaruam, duhet të themi që edhe anëtarët e opozitës nuk mbeten pas. Dhe jo, nuk janë para të bëra nga karriera në politikë, janë para biznesi. Siç duket, është ‘jeleku i shpëtimit’ për të gjithë ata që nuk u ka ecur me grumbullimin e votave.

Dhe një prej tyre është Agron Shehaj, i cili zotëron edhe apartament në Itali, me vlerë 950 mijë euro. Me këto deklarime, Shehaj nuk ka pasur nevojë ta prekë ndonjëherë pagën si deputet! Megjithëse duhet thënë, ai ka deklaruar se e ka dhuruar, por jo se kjo gjë e ka sikletosur shumë financiarisht…

Gazment Bardhi deklaron pagën e tij si deputet si një pjesë të mirë të ardhurave, por politikën nuk e ka nisur si ‘i varfër’. Ndoshta trashëgimia ka luajtur një rol mjaft të mirë tek financat e tij.

Edhe për Luan Baçin mund të themi të njëjtën gjë! Ai mund të jetojë lirisht deri në disa breza vetëm me qiratë e pronave që zotëron. Nuk mungojnë as llogaritë bankare, të të vetat apo edhe të bashkëshortes së tij, Elsa Baçi.

Tritan Shehut duket se i ka vlejtur më shumë bluza e bardhë e mjekut se sa ulësja në Kuvend. Këtë gjë e tregojnë të ardhurat e tij nga “Zoja e Këshillit të mirë”, që nuk krahasohen me ato të një ligjvënësi.

Ndoshta është zona më e lirë, por Flamur Hoxha në pamje të parë duket sikur zotëron të gjithë Kukësin! Nga veprimtarët e shumta në të cilat është angazhuar, ai zotëron një sërë pronash të patundshme dhe i ka zgjeruar ato edhe në Jug të vendit. Nuk mungojnë as llogaritë bankare!

Edhe për Isuf Çelajn e Ramadan Likën mund të themi të njëjtën gjë. Siç duket për opozitarët, rritja e pasurisë varet vetëm nga pronat në vendlindje, pastaj nëse ata i shumëfishojnë përmes biznese, është një bonus për ta!

 

Ndryshe nga të tjerët, Fatmir Mediu e ka trashëguar tek vajzat aftësinë për të bërë biznes, të cilat janë angazhuar në këtë dhe mesa duket, u ecën mjaft mirë!

Ina Zhupa është e vetmja grua demokrate në këtë listë. Ajo e ka nisur me disa llogari të vogla rrjedhëse, por sot gëzon një depozitë kursimi mjaft të majmë!

Në një vend ku ndihma ekonomike është luks dhe paga minimale mban mijëra familje, ligjvënësit tanë duket se jetojnë në një realitet paralel, me karta krediti pa limit dhe pasuri të pamatë. Dhe ky nuk është më hendek social. Është një kontrast i rrezikshëm që e kthen dyshim te përfaqësimi. Kuvendi kushton shumë. Dhe mesa duket jo vetëm në lekë. / ZËRI