Një ngjarje e rëndë ka ndodhur mbrëmjen e së hënës në Çarshinë e Shkupit.
Dy shqiptarë janë vrarë ndërsa një është plagosur si pasojë e një sulmi me armë nga persona të maskuar brenda një lokali.
Ngjarja ka ndodhur rreth orës 21:00, në një shisha bar në rrugën “Samoilova”.
Jeton Krivanjeva dhe Enes Iseni kanë mbetur të vrarë mbrëmjen e djeshme. ndërsa një person i tretë po lufton për jetën. Policia dhe prokuroria kanë nisur hetimin duke mbledhur provat e nevojshme nga vendngjarja.
Të dy viktimat rezultojnë emra të njohur për Policinë e Shtetit për shkak të së shkuarës së tyre kriminale.
Gjithçka ka ardhur pas përplasjes së dy grupeve në këtë lokal që ndodhet në katin e parë të një hoteli.
Sipas informacioneve të para, vrasësit janë prezantuar si policë dhe kanë thënë se po bëjnë kontroll në lokal dhe pasi i kanë gjetur personat për të cilët kishin ardhur, kishin hapur zjarr të shpejtë dhe i kanë vrarë dy shqiptarët.
Pas vrasjes, autorët kanë djegur makinën me të cilën kishin ardhur në vendngjarje, ndërsa janë zhdukur në drejtim të panjohur nga një lagje në afërsi të vendit të vrasjes.
j.l./ dita
