Edhe pse u pa teksa vraponte me pistoletë në dorë dhe me destinacion pothuajse të qartë, duket se shpejtësia në reagim si nga qytetarët ashtu dhe Policia, kanë lënë për të dëshiruar. Habib Rexha erdhi nga Anglia më 5 maj dhe askush s’e vuri re se mund të sulmonte në gjakmarrje. Nga ana tjetër viktima Arjan Gosa nuk ruhej aspak, edhe pse me dy hasmëri. Mbajtja e të atit me vete nuk i ka shërbyer. Rexha erdhi me duar në xhepa ku mbante armën e kapuç në kokë dhe iku me pistoletë në dorën e majtë, me të cilën edhe qëlloi, pasi dyshohet se të djathtën e kishte invalide.
Këto janë pamjet e Habib Rexhës, vrasësit të dyshuar të Arjan Gosës një ditë më parë në Kavajë. Kamerat e sigurisë së bizneseve të ndryshme në qytet e kanë filmuar teksa autori u largua në këmbë pasi qëlloi me një plumb në kokë Arjan Gosën. Ngjarja ndodhi në një lokal në lagjen Nr.1 të Kavajës pasditen e së dielës, teksa Arjan Gosa ishte duke konsumuar një kafe me babain e tij. Ky i fundit pa të birin t’i vritej përpara syve.
Habib Rexha u identifikua nga policia disa orë pas krimit dhe u shpall zyrtarisht në kërkim, që ende vijon të jetë. Për kapjen e tij, policia ka vendosur në dispozicion edhe 10 mijë Euro për qytetarët që japin informacione. Ngjarja e rëndë, vjen më pak se dy muaj nga vrasja e Edmond Gosës, vëllait të Arjan Gosës, i cili në fund të marsit, pas një sherri për motive banale në një tjetër lagje të Kavajës u konfrontua fizikisht me shtetasin Altin Rexha, vëllain e autorit të shpallur në kërkim për ngjarjen e kësaj të dielë.
