Rusia është një shtet që financon terrorizmin.
Ky është përfundimi i fundit i Parlamentit estonez, në të cilin është votuar thuajse unanimisht për të votuar një ligj, i cili e njeh Moskën si “regjim terrorist”, për luftën që ka ndërmarrë në Ukrainë dhe krimet e kryera ndaj banorëve ukrainas.
Ligjvënësit estonezë, e kanë firmosur aktin duke u mbështetur edhe në aneksimet e fundit ruse në katër rajonet e territorit ukrainas të Donetskut, Luhanskut, Zaporizhzhias dhe Khersonit, ku separatistët shpallën fitore me mbi 95% të votave.
Prej 101 deputetëve që ka Parlamenti estonez, 88 votuan pro ligjit, 10 mungonin në sallë dhe tre të tjerë, abstenuan.
“Presidenti rus, Vladimir Putin dhe regjimi i tij, me kërcënimet për përdorimin e armëve bërthamore, e ka kthyer Rusinë në rrezikun më të madh të paqes në botë”, shkruhet në aktin e kaluar me shumicë parlamentare.
Po ashtu, e pritshme është edhe një shpallje e radhës si grupime terroriste për separatistët e vendosur në rajonet lindore të Donetskut dhe Luhanskut, si edhe për grupimin e mercenarëve Wagner, i kontraktuar nga shteti rus.
Estonia është shteti i parë perëndimor, i cili e njeh zyrtarisht Rusinë si shtet terrorist, pas kërkesa të shumta të Kievit dhe presidentit Volodymyr Zelensky, ndaj vendeve të Perëndimit, për ta ndërmarrë këtë akt.
a.m/dita
