Kursi i këmbimit të Euros me Lekun ka pësuar uljen më të madhe që prej fundit të muajit Qershor. Sipas kursit zyrtar të këmbimit Euro të mërkurën u këmbye me 116.4 Lekë.
Sipas ekspertit të ekonomisë Adrian Civici, në dobësimin e monedhës europiane ka ndikuar sasia e madhe e Eurove formale dhe informale që gjendet në vendin tonë.
Adrian Civici: Ka të bëjë me sasinë e tepërt ose të bollshme të Eurove në tregun monetar shqiptar, sasi e cila bën presion në kursin e këmbimit duke cuar në zhvlerësimin relativ të euros dhe fuqizimin e Lekut.
Dobësimi i Euros në raport me Lekun sjell efekte pozitive kryesisht tek blerësit dhe kredimarrësit në Euro, por që të ardhurat kryesore i kanë në lek. Por që për eksportuesit vlen e kundërta.
Adrian Civici: Ka edhe disa efekte negative, që ka të bëjë me eksportuesit shqiptarë që shpenzimet kryesore i kanë në lek dhe eksportet i kanë në Euro.
Për ekspertin e ekonomisë, Euro do vijojë të mbetet në rënie në raport me Lekun, pasi me afrimin e festave të fundvitit shtohet edhe më tej sasia e Eurove që hyjnë në vend. Edhe monedha amerikane ka shënuar javët e fundit një rënie të vazhdueshme, ku 1 dollar shkëmbehet me afro 110 lekë.
o.j/dita
