Çmimi i bukës u rrit në gusht me gati 20% në Bashkimin Evropian pasi pushtimi rus i Ukrainës – si eksportuesit kryesorë të drithërave ashtu edhe të plehrave – vazhdoi të prishë tregjet globale dhe të përshpejtojë inflacionin.
Çmimi i grurit është rritur që nga shkurti, kur lufta ndaloi eksportet përmes Detit të Zi për muaj të tërë, ndërsa eksportet e plehrave u kufizuan gjithashtu pasi prodhuesit rusë humbën aksesin në portet e Detit Baltik që përdornin për të transportuar amoniak në mbarë botën.
Çmimi mesatar i bukës në BE ishte 18% më i lartë në gusht krahasuar me një vit më parë, sipas të dhënave të Eurostat. Kjo është rritja më e madhe që nga dhjetori 2017, kur Eurostat filloi të mbajë statistika. Në gusht 2021 çmimi mesatar i bukës u rrit me 3% nga viti në vit.
Rritjet më të mëdha nga viti në vit janë regjistruar në Hungari dhe Lituani, me përkatësisht 66% dhe 33%. Më e ulëta është regjistruar në Francë (8%), Holandë dhe Luksemburg (10%).
Eurostat konfirmoi të premten se inflacioni në eurozonë shënoi nivelin më të lartë të të gjitha kohërave prej 9.1% në gusht, i nxitur nga çmimet e larta të energjisë dhe ushqimeve.
Bloomberg: 80% e mundësive për një recesion në Eurozonë
Rreziku i një recesioni në Eurozonë ka arritur nivelin më të lartë që nga korriku 2020, sipas ekonomistëve të Bloomberg. Ekspertët flasin për një rrezik pothuajse të pashmangshëm recesioni, ndërsa shqetësimet intensifikohen se dimri “i rëndë” i energjisë do të ngadalësojë ndjeshëm aktivitetin ekonomik në vendet anëtare të Eurozonës. Ekonomistët e anketuar nga Bloomberg tani shohin një recesion të mundshëm për dy tremujorë radhazi në 12 muajt e ardhshëm në 80%, nga 60% e parashikuar nga një studim i mëparshëm. Gjermania, ekonomia më e madhe e unionit dhe ndër vendet më të ekspozuara ndaj shkurtimeve në furnizimet me gaz rus, ka të ngjarë të shohë një tkurrje që në këtë tremujor. Inflacioni tani pritet të rritet në 9.6% në tre muajt e fundit të vitit, pothuajse pesë herë më shumë se objektivi i Bankës Qendrore Evropiane (BQE). Pjesëmarrësit e anketës nuk shohin se inflacioni i afrohet objektivit prej 2% deri në vitin 2024.
a.m/dita
