Një imazh i manipuluar përmes inteligjencës artificiale, ku paraqitet kryetarja e Nënkomisionit kundër Dezinformimit, Iris Luarasi, krah një diplomati të huaj, ka qarkulluar së fundmi në disa portale mediatike, duke nxitur një reagim të fortë nga vetë Luarasi.
Në foton e fabrikuar, personat në fjalë shfaqen sikur po mbahen për dore gjatë një aktiviteti publik. Imazhi origjinal është shkëputur nga një veprimtari e zhvilluar në zonën e ish-burgut të Spaçit, ku duart e mbajtura janë shtuar artificialisht për të krijuar një lajm fals me prapavijë denigruese.
Përmes një deklarate të drejtpërdrejtë, Luarasi e ka cilësuar këtë veprim si një akt që përçon njëkohësisht homofobi dhe mizogjini, duke keqpërdorur teknologjinë në shërbim të shpifjes.
“Njoftim urgjent nga bota paralele e portaleve. Kemi një ‘lajm’ që në një klik arrin të jetë njëkohësisht homofob dhe mizogjin. Dy sulme, një foto. Efikasitet i vërtetë, vetëm se i vënë në shërbim të gënjeshtrës. Foto e publikuar është punuar me inteligjencë artificiale, që të dukemi sikur jemi kapur për dore. Kjo nuk është gazetari, por është një kurs i shpejtuar se si të dezinformosh”, shprehet ajo.
Ajo ka theksuar ironinë e situatës, duke qenë se vetë mban detyrën e kryetares së nënkomisionit parlamentar kundër dezinformimit. Sipas saj, ky rast shërben si një shembull konkret se si teknologjia po përdoret për të dëmtuar figurën e zyrtarëve dhe diplomatëve të huaj, duke cenuar njëkohësisht standardet që kërkohen nga media në procesin e integrimit europian.
“Ironia më e madhe? Unë jam kryetare e nënkomisionit kundër dezinformimit. Dhe ju sapo më dhuruat rastin studimor më perfekt që mund të kërkoja. Sepse dezinformimi nuk është shaka: është tallje ndaj lexuesit, dëm ndaj një diplomati dhe një goditje ndaj vetë standardeve që Bashkimi Europian kërkon nga media shqiptare”, nërmvizon Luarasi.
Fotoja origjinale është marrë gjatë një aktiviteti në Spaç, një vend me simbolikë të fortë historike.
“Kush luan me të vërtetën, duhet të përgjigjet edhe për të. Përgjegjësia mediatike nuk është opsion, por është detyrim. Kur fabrikon realitete me AI, s’je gazetar. Je mashtrues ordiner. Liria e medias nuk është leje për të falsifikuar! Foto e dytë është fotoja origjinale, e paretushuar: në Spaç, aty ku dikur burgoseshin ata që thoshin të vërtetën. Sot disa e keqpërdorin lirinë që të tjerët e paguan me burg, për të fabrikuar urrejtje”, përfundon ajo.
Rasti rikthen edhe një herë në vëmendje debatin mbi nevojën e kontrollit të përmbajtjeve të gjeneruara nga Inteligjenca Artificiale (AI) dhe përgjegjësinë ligjore e etike të mediave online në vend.
m.a. / dita
