Falsifikonin radarët dhe vendosin gjoba pa të drejtë, pezullohen nga detyra 5 efektivë të policisë rrugore

5 efektivë të policisë rrugore të pezulluar ka qenë bilanci i drejtorisë Rajonale të AMP në Tiranë.

Bëhet fjalë për Albi Meta 33 vjeç, Euklid Meci 31 vjeç,  Ilirjan Kalemi 40 vjeç, Gerald Shabani 26 vjeç dhe Jurgen Muha  27 vjeç  të gjithë me detyrë inspektorë.

Sipas hetimeve të kryera mësohet se, 5 efektivët kanë shpërdoruar detyrën duke ndëshkuar me gjoba padrejtësisht qytetarët. Policët, kanë falsifikuar të dhënat e radarëve në kundërshti me ligjin duke sjellë si pasojë dëm të konsiderueshëm ekonomik si dhe cënim të interesave të ligjshëm të shtetit.

Njoftimi i policisë:

Drejtoria Rajonale e AMP Tiranë ka pezulluar nga detyra 5 efektivë të Polciisë Rrugore

Drejtoria Rajonale e AMP Tiranë ka zbatuar urdhrin e Prokurorisë për ekzekutimin e vendimit të Gjykatës së Rrethit Gjyqësor Tiranë, e cila ka caktuar masën e sigurimit personal me karakter ndalues “Pezullim i ushtrimit të një detyre a shërbimi publik” për kryerjen e veprës penale “Shpërdorim detyre” ndaj 5 punonjësve të policisë pranë Komisariatit Rajonal të Qarkullimit Rrugor Tiranë:

– Inspektor A. M., 33 vjeç, me detyrë trupë shërbimi pranë Komisariatit Rajonal të Qarkullimit Rrugor Tiranë;

–  Inspektor E. M., 31 vjeç, me detyrë trupë shërbimi pranë Komisariatit Rajonal të Qarkullimit Rrugor Tiranë;

– Inspektor I. K., 40 vjeç, me detyrë trupë shërbimi pranë Komisariatit Rajonal të Qarkullimit Rrugor Tiranë;

–  Inspektor G. SH., 26 vjeç, me detyrë trupë shërbimi pranë Komisariatit Rajonal të Qarkullimit Rrugor Tiranë;

–  Inspektor J. M., 27 vjeç, me detyrë trupë shërbimi pranë Komisariatit Rajonal të Qarkullimit Rrugor Tiranë.

Në vijim të hetimeve për procedimin penal nr. 5333/2021, pas arrestimit në flagrancë të 2 punonjësve të Policisë Rrugore në datë 03.03.2022 dhe analizimi i të dhënave/fotografive të realizuara nga radari i sekuestruar, u administruan prova dhe fakte se punonjësit e mësipërm të policisë, në kohë dhe vende të ndryshme, gjatë ushtrimit të detyrës së tyre funksionale si agjent verifikues pranë Komisariatit të Qarkullimit Rrugor Tiranë, kanë shpërdoruar detyrën duke ndëshkuar me masa administrative në mënyrë arbitrare, si dhe duke fallsifikuar të dhënat e fiksuara nga radari në kundërshtim me ligjin, duke sjellë si pasojë dëm të konsiderueshëm ekonomik dhe cënimin e interesave të ligjshëm të shtetit.

Në bashkëpunim me Prokurorinë pranë Gjykatës së Shkallës së Parë Tiranë vazhdojnë hetimet për përfshirjen e punonjësve të tjerë dhe vënien e tyre para përgjegjësisë ligjore.

a.m/dita