Familjarët e Fatmir Sulovarit dhe Leonard Theodhorit, të zhdukur prej datës 6 Prill në Sarandë, kanë zhvilluar për herë të dytë një takim kreun e Policisë së Shtetit, Muhamet Rrumbullaku. Për rreth 30 minuta të afërm të dy të zhdukurve kanë diskutuar me kryepolicin rreth hetimeve dhe kërkimeve që po zhvillohen për gjetjen e trupave të familjarëve të tyre. Ashtu si në takimin e zhvilluar 2 javë më parë, Drejtori i Përgjithshëm i Policisë i ka garantuar atyre zbardhjen e ngjarjes.
Megjithatë burime nga grupi hetimor bëjnë me dije se nga hetimet dhe kërkimet e kryera në terren ende nuk dhëna që mund të çojnë policinë në gjetjen e trupave të Fatmir Sulovarit dhe Leonard Theodhorit, ky i dyti i njohur edhe si “Koçolja”.
Të dy këta të fundit janë emra të njohur për policinë pasi në të shkuarën kanë pasur precedent në fushën e narkotikëve dhe krimeve të tjera, duke shtuar pistat dhe konfuzuar hetuesit. Për këtë ngjarje të rëndë, deri tani policia ka arrestuar vetëm një 28-vjeçar, të identifikuar si Sofokli Baxheri, me dyshimet se ka dijeni për personat që mund të fshihen pas zhdukjes së dy personave.
