Fitër Bajrami është një festë e shënuar në kalendarin islam, pasi celebrojnë një muaj pas agjërimit dhe faljes së namazit të teravitëve, traditë e këtij Muaji të Shenjtë.
Pas faljes së mëngjesit, rituali vazhdon me prerjen e kurbanit duke vijuar me urimet.
Besimtarët myslimanë në kryeqytet falën namazin para Sheshit Skëndërbej në orën 06:55, siç edhe është bërë zakonisht.
Ceremonia u zhvillua me ilahi dhe fjalën e imamëve të pranishëm e më pas, besimtarët drejtohen për në shtëpitë e tyre, ku vijohet me pjesën tjetër të festimeve, ndër to, edhe vizitat në shtëpitë e të afërmve dhe njerëzve të dashur.
Fitër Bajrami është festa e cila bëhet pas mbarimit të muajit të Ramazanit.
Emri Fitër Bajram vjen nga fakti se myslimanët para ditës së Bajramit shpërndajnë lëmoshë, solidarizohen me të varfrit, dhe kështu në këtë mënyrë festojnë së bashku këtë festë.
Kreu i Komunitetit Mysliman të Shqipërisë, Bujar Spahiu uroi sot besimtarët myslimanë për festën e Fitër Bajramit. Në një komunikim për mediat, Spahiu po ashtu uroi shqiptarët dhe mbarë besimtarët myslimanë në mbarë botën për këtë festë të rëndësishme në kalendarin islam.
Ai u pyet dhe për faktin se pse nuk është hapur ende xhamia e Namazgjasë teksa tha se nuk ka xhami në asnjë vend të botës që t’i marrë këta njerëz.
“Kjo festë qoftë një ditë e bukur dhe e mirë. Paqe dhe begati. Paqe në familjen tona, Për një Shqipëri sa më të mirë dhe të begatë. I lutem Zotit që t’i sjellë shqiptarëve begati, paqe dhe drejtësi. Ky Bajram është një festë ku ne agjëruam 30 ditë për Zotin. Sot kemi të drejtën e plotë për të festuar me të gjithë njerëzit, për ta bashkëndarë këtë festë. Gëzuar Fitër Bajramin shqiptarëve dhe popujve anë e mbanë botës. Bajramet janë festa që duhen falur nëpër sheshe. Shpresojmë që edhe ajo xhami do mbarojë dhe do falemi edhe aty. Sheshet janë të dendura, nuk ka xhami në asnjë vend të botës që t’i zërë njerëzit”, tha Spahiu.
j.l./ dita