FIFA konfirmoi zyrtarisht prezantimin e pozicionit jashtë loje gjysmë automatik në Kupën e Botës 2022 në Katar. Risia teknologjike do të realizohet nëpërmjet instalimit të 12 kamerave në stadium, të cilat do të funksionojnë në mënyrë të veçantë nga kamerat e transmetimeve televizive.
Teknologjia e re do të përcaktojë 29 pika me të dhëna të çdo lojtari, duke treguar me saktësi thuajse perfekte pozicionimin e tyre në fushë. Këto informacione do të përdoren nga A-VAR, një sistem paralel me VAR, i cili do të kujdeset vetëm për pozicionet jashtë loje. Gjyqtarët e sallës së A-VAR do të verifikojnë sinjalizimin dhe do t’ia komunikojnë atë më pas gjyqtarëve në fushë.
Për të ndihmuar në përmirësimin e vendimeve rreth pozicioneve jashtë loje do të shërbejë edhe topi i Botërorit 2022. Ai do të ketë të instaluar një sensor, i cili do të transmetojë të dhëna tejet të shpejta, që lejojnë përcaktimin e pozicionit ekzakt në fushë.
Sipas presidentit të Komisionit të Arbitrave të FIFA-s, Pierluiggi Colina, nuk bëhet fjalë për një pozicion jashtë loje robot. Arbitrat dhe asistentët mbeten përgjegjës për vendimet gjatë ndeshjeve. Në këtë rast, teknologjia do të ndihmojë që vendimet, edhe ato më të vështirat, të jenë më të sakta dhe më të shpejta.
Episodet do të transmetohen në ekranet e mëdha të stadiumeve dhe në televizione nëpërmjet animimeve tredimensionale, për t’i mundësuar tifozëve të kuptojnë më qartë vendimet që jepen.
Teknologjia e pozicionit jashtë loje gjysmë-automatik u testua në Botërorin e Klubeve 2021 dhe në Kupën e Arabisë dhe do të përdoret zyrtarisht në Botërorin “Katar 2022”, i cili nis prej 21 nëntorit. Nëse do të rezultojë efektiv, hapi i radhës do të jetë pozicioni jashtë loje automatik. Kjo do të thotë që përllogaritjet e sistemit A-VAR nuk do të shqyrtohen nga arbitrat e sallës, por do të sinjalizojnë menjëherë arbitrat në fushë.
o.j/dita
