FIFA ka zbuluar formacionin më të mirë të Kupës së Botës 2026, duke përfshirë 11 lojtarët që shkëlqyen më shumë gjatë turneut të kësaj vere në Amerikën e Veriut.
Në formacionin ideal dominojnë kampionët e rinj të botës. Spanja, triumfuesja e Botërorit 2026, përfaqësohet me tre futbollistë, po aq sa edhe Franca. Argjentina ka dy emra në këtë formacion, ndërsa nga një lojtar vijnë nga Norvegjia, Anglia dhe Kepi i Gjelbër.
Në portë është vendosur Vozinha, i cili shkroi një nga historitë më të bukura të këtij Botërori. Portieri afrikan fitoi admirimin e botës me paraqitjet e tij, duke ndihmuar skuadrën e tij të përballej denjësisht me Spanjën dhe Argjentinën, pa u mposhtur brenda 90 minutave në këto duele.
Në mbrojtje janë dy kampionët e rinj të botës me Spanjën, Marc Cucurella dhe Pedro Porro, ndërsa në qendër të repartit defensiv janë vendosur Dayot Upamecano i Francës dhe Lisandro Martinez i Argjentinës.
Mungojnë Laporte dhe Cubarsi, me këtë të fundit veçanërisht, që u konsiderua si pika më e fortë e mbrojtjes së Spanjës dhe mbrojtësi më i mirë i Botërorit.
Mesfusha përbëhet nga tre yje të mëdhenj: Jude Bellingham i Anglisë, Rodri i Spanjës dhe Michael Olise i Francës, të cilët lanë gjurmë me paraqitjet e tyre gjatë gjithë kompeticionit.
Në repartin ofensiv gjenden tre nga emrat më të mëdhenj të futbollit botëror. Në krye të sulmit është Kylian Mbappe, golashënuesi më i mirë i turneut me 10 gola, i cili gjithashtu vendosi rekordin historik si golashënuesi më i mirë në historinë e Kupave të Botës me 22 gola.
Krahas francezit janë vendosur Lionel Messi dhe Erling Haaland. Kapiteni argjentinas realizoi tetë gola në këtë Botëror, ndërsa sulmuesi norvegjez e mbylli turneun me shtatë finalizime.
