PËRGJIMET: Një gazetare e infiltruar zbulon se Balluku vazhdon të drejtojë Ministrinë

Është transmetuar një investigim mbi pushtetin e Belinda Ballukut në Ministrinë e Infrastrukturës dhe Energjisë. Në letra ajo është shkarkuar nga funksionet publike dhe në zyrë është vendosur një ministër tjetër. Por në institucionet që janë nën varësi të kësaj ministrie, drejtuesit flasin ndryshe.

Emisioni Fiks Fare hyri në disa prej këtyre institucioneve, u prezantua si punëkërkuese dhe bisedoi drejtpërdrejt me titullarët. Në biseda, emri i Belinda Ballukut del përsëri si “shefe”, si personi që mund të ndikojë në emërime, në punësime dhe në vendimmarrje.

Drejtuesit e institucioneve vazhdojnë ta trajtojnë si autoritetin që duhet dëgjuar, duke e bërl të qartë se Balluku është ish-ministre vetëm në letra. Në praktikë ajo vazhdon të ushtrojë pushtetin e ministres.

“Nëse Bela e çon emrin…”

Investigimi nis në Autoritetin e Aviacionit Civil, ku gazetarja e Fiks Fare kontakton drejtorin Maksim Et’hemaj, duke shprehur interes për një vend pune në sektorin e medias. Gjatë bisedës, Et’hemaj flet për punonjësen aktuale të medias dhe e lidh atë me Belinda Ballukun.

Sipas tij, nëse ajo do të zëvendësohej dhe në vend të saj do të vinte një person tjetër, kjo do të ishte thjesht çështje emrash, duke lënë të kuptohet se vetëm një propozim nga Balluku do të merrej në konsideratë.

“Nëse je mikesha e shefes, je dhe e imja”

Fiksi shkon më tej, në Inspektoratin Shtetëror Teknik dhe Industrial. Edhe këtu skenari është i njëjtë: kërkesë për punësim. Drejtori Sokol Zajmi shprehet: “Nëse je mikesha e shefes, je dhe e imja.” Më pas ai përdor edhe një tjetër shprehje: “Ushtarët zëvendësohen kollaj, po mbretëresha nuk zëvendësohet dot.” Referenca lidhet me Belinda Ballukun.

“Belinda Balluku e ka vënë Enea Karakaçin”

Investigimi vijon në Autoritetin Kombëtar për Sigurinë dhe Emergjencat në Miniera. Gazetarja e Fiks Fare bisedon me drejtorin Rrapush Tola, sërish për mundësinë e punësimit. Gjatë bisedës, Tola pretendon se Belinda Balluku ka vendosur Enea Karakaçin në krye të ministrisë dhe se vetëm një sinjal prej saj mund të ndikonte në mundësinë e punësimit të gazetares.

Këshilltari i Ballukut ende në ministri

Fiksi vijon investigimin brenda vetë Ministrisë së Infrastrukturës dhe Energjitikës. Gazetarët kontaktojnë Florjan Serjanin, ish-këshilltarin e Belinda Ballukut, i cili vijon të mbajë të njëjtën detyrë në ministri megjithëse këshilltarët largohen kur ndërrohen ministrat. Gjatë telefonatës, ai konfirmon se është ende në detyrë, ndërsa thotë se merret edhe me PR-in e Belinda Ballukut.

Më pas, në një takim të zhvilluar në ambientet e ministrisë, Serjani flet për drejtuesit e agjencive në varësi të MIE-së. Sipas tij, drejtuesit janë vendosur me ndërhyrjen apo sugjerimin e Belinda Ballukut. Ai përmend edhe drejtuesin e AKBN-së, duke thënë se Balluku e ka sugjeruar atë. Por dëshmia shkon edhe më tej. Serjani tregon se është takuar me Belinda Ballukun vetëm dy ditë përpara bisedës me gazetaren.

Drejtori i AKBN-së: “Do t’i çoj të fala”

Pas kësaj dëshmie, Fiks Fare kontakton Genci Tërpon, drejtorin e AKBN-së. Tërpo konfirmon se ka takuar Ballukun në fund të muajit gusht. Gjatë bisedës, pranon “t’i përcjellë të falat” dhe shprehet se do të shohë situatën për punësimin e gazetares.

Përballja me Ballukun

Pas gjithë dëshmive, Fiks Fare shkon te personi që përmendet vazhdimisht në këto biseda, Belinda Balluku.

Gazetarja e takon teksa ajo ecën në zonën e Liqenit të Tiranës. Balluku fillimisht reagon ndaj mënyrës së ndjekjes dhe më pas i drejtohet edhe operatorit të Fiks Fare. Por pyetjes kryesore, pse drejtuesit e institucioneve vazhdojnë ta konsiderojnë atë “shefe”, Balluku nuk i përgjigjet.

Në vend të përgjigjes, ajo akuzon për gjobëvënie dhe kritikon mënyrën e punës së gazetarëve. Teksa hyn në palestër, Balluku i drejtohet gazetares: “Mos u bëj gjobaxhie.”

Belinda Balluku është shkarkuar nga posti por dëshmitë provojnë se është larguar vetëm nga karrigia e ministres, jo nga nga pushteti që lidhet me atë karrige

Kemi përballë një situatë që kërkon sqarim institucional. Nëse këto dëshmi verifikohen a duhet SPAK të ndërmarrë hapat ligjorë që parashikon ligji?

Fiks Fare, TCH