Udhëheqësit e 40 vendeve u takuan në Paris, krijohet Fondi për Ruajtjen e Pyjeve
Kombet e pasura janë zotuar të ndihmojnë me 100 miliardë dollarë vendet e varfra në luftën e tyre me pasojat e ndryshimit të klimës. Presidenti Emmanuel Macron mikpritës i samitit të udhëheqësve, njoftoi arritjen e marrëveshjes pas përfundimit të një samiti në Paris, ku morën pjesë rreth 40 udhëheqës botërorë, përfshirë kryeministrin e Kinës.
“Së pari gjatë këtij samiti, ne arritëm gjëra shumë konkrete. Finalizuam premtimin për financimin me 100 mld dollarë të përballjes me pasojat e ndryshimit të klimës. I përgëzoj të gjithë ata që e mbështetën marrëveshjen. Gjithashtu kemi krijuar një fond për biodiversitetin dhe mbrojtjen e pyjeve.”
Objektivi i samitit është të rrisë financimin për shtetet me të ardhura të ulëta në luftën me pasojat e ndryshimeve klimatike. Çdo reformë kërkon miratimin e vendeve të pasura, të cilat jo vetëm dominojnë institucionet financiare globale, por janë gjithashtu përgjegjëse për shumicën e emetimeve të dyoksidit të karbonit.
Në të vërtetë, zotimi prej 100 miliardë dollarësh është shumë larg nevojave aktuale të kombeve të varfra dhe përbën një shumë simbolike në sfondin e dështimit të vendeve të pasura për të ofruar fondet e premtuara për klimën. Këtë e theksoi edhe kancelari gjerman Olaf Scholz teksa u kërkoi pjesëmarrësve të samitit të veprojnë e t’u përmbahen zotimeve.
“Duhet t’u përmbahemi zotimeve tona, të veprojmë ashtu siç flasim. Dhe nëse veprojmë kështu, besoj se ka një shans për ta bërë vendin tonë një botë më të mirë.”
Mos financimi i vendeve të varfra ka nxitur mosbesim në negociatat e zgjeruara midis vendeve që përpiqen të shtojnë përpjekjet për reduktimin e emetimit të dioksidit të karbonit.
o.j/dita
