Nga Bashkim Shatrafili
Kryeplak i fshatit, Luzat
Isuf Kalo djalë Luzati / Ruajti rrënjët prej fshati / Fshatit tonë me dafina / Me kulturë, dëshmorë dhe trima/ Isuf Kalo hijeshia / Urtësia, bujaria…
Këto vargje gjenden në librin Ligjërimet e Pyllit, botuar vitin e kaluar nga Selaudin Guma, mik i familjes Kalo.
Vendimi i Isufit për të ardhur këtu, për t’u prehur pranë gjyshit të tij, Ali Kalo Luzati, atdhetarit që iu drejtua Presidentit Wilson për të mos lejuar copëtimin e mëtejshëm territorial të Shqipërisë 100 vjet më parë, na ka prekur, por edhe na ka nderuar.
Tashmë në lëndinën e Luzatit të bukur, rrëzë malit mbi xhadé, siç thotë kënga që do t’i thurrte vëllai Novruz, do të kemi një gur tjetër të rëndë, një pasuri intelektuale, që do shkrihet e bëhet një me mençurinë e tërë burrave, grave, djemve e vajzave, të cilët me veprën e tyre kanë mbajtur lart emrin e fshatit tonë.
Isufi ka lënë pas një trashëgimi me vlerë, ide e projekte të shkruara për shërbimin shëndetësor e mjekësor, por ai na ka dhënë edhe modelin e një njeriu me zemër e botë të gjerë, e një dijetari guximtar e të thjeshtë që frymëzon këdo.
Ne e çmojmë dhe do ta kujtojmë atë edhe për ndjenjën e dashurisë që ai rrënjosi tek brezi i dytë, fëmijët, nipat e mbesat për Luzatin.
Gëzohemi sa herë ata vijnë këtu për të njohur nga afër fshatin, banorët e tij, doket e pemët tona, për të pirë nga uji ynë i ftohtë, duke mbajtur gjallë kështu një marrëdhënie të ndërtuar për shumë dekada me aq dashuri nga vëllezërit Kalo e motrat e tyre.
Isufit i buronte nga brënda një dëshirë e madhe për t’u treguar të tjerëve vlerat, historinë e Luzatit e të banorëve të tij, madje këtë e bënte me shumë pasion. Kam patur rastin ta shoqëroja kur ndalonte këtu me miq e shokë dhe ndër të tjera, u thoshte me humorin e tij të spikatur, se Luzati ka shumë vlera, po për dy gjëra nuk ja kalon askush: Fiqtë dhe banorët gojëmbël.
Sot jemi padyshim të pikëlluar që ndahemi fizikisht prej tij, por ne do ta kujtojmë gjithmonë djalin tonë që zgjodhi Luzatin si strehën e fundit.
Në emër të luzatarëve u përcjell ngushëllimet tona më të ngrohta bashkëshortes besnike e po aq të dashur për Luzatin, Firdesit, Ilirit dhe Entelës dhe gjithë të dashurve të tij, duke i siguruar se ai do prehet i qetë këtu pranë nesh.
Lamtumirë Isufi ynë! Le të mbajmë një minutë heshtje në nderim të tij.
—–
Fjala e përcjelljes së fundit të doktor Kalos, Luzat, 28 janar 2023
