Shoqëria “Arlis Ndërtim” ka reaguar zyrtarisht pas zjarrit të rënë në kompleksin e ndërtuar nga kjo kompani në zonën e njohur si “Farmacia 10”, ku dhjetëra apartamente u dogjën.
Teksa shpreh solidaritet me familjet, banesat e të cilëve janë shkrumbuar nga zjarri, kompania thekson se pavarësisht se nuk ka asnjë përgjegjësi ligjore do të financojë plotësisht rindërtimin e fasadës së pallatit të dëmtuar, si dhe rikonstruksionin e të gjitha apartamenteve të prekura.
Kompania sqaron se objekti është ndërtuar në përputhje të plotë me lejen dhe se të gjitha punimet janë kryer në përputhje me standardet e sigurisë dhe legjislacionin në fuqi, si dhe janë kontrolluar e certifikuar nga institucionet përgjegjëse.
“Shoqëria “Arlis Ndërtim” shpk pavarësisht se nuk mbart asnjë përgjegjësi ligjore, por në kuadër të përgjegjësisë sociale si kompani, si dhe angazhimit të saj për të qenë pranë njerëzve që e kanë besuar dhe banorëve të prekur, merr përsipër me shpenzimet e saj, rindërtimin e plotë të fasadës së pallatit të dëmtuar nga zjarri si dhe rindertimin e të gjithë apartamenteve të dëmtuara duke i kthyer në gjendjen fillestare, pra në të njëjtat kushte që banorët e kanë marrë apartamentin me çelësa në dorë në momentin e dorëzimit.
Ky angazhim synon të kontribuojë në rikthimin sa më të shpejtë të kushteve normale të jetesës dhe në minimizimin e pasojave të kësaj ngjarjeje”, thuhet në reagimin e administratorit Xhejsi Lilo.
Po ashtu kompania shprehet e gatshme për bashkëpunim me institucionet dhe grupet e ekspertëve për të sqaruar çdo rrethanë të incidentit.
j.l./ dita
