Fondi Monetar Ndërkombëtar është skeptik mbi efektet afatgjata të planit të qeverisë për të falur gjoba dhe detyrime shumëvjeçare për bizneset përmes ‘Paqes Fiskale’.
Në konferencën e përmbylljes së misionit periodik të vëzhgimit të fondit në Tiranë, drejtuesja e FMN në Shqipëri, Anke Weber tha se drafti i propozuar ka elementë që minojnë progresin e vendit në mirëadministrimin e të ardhurave
“Lidhur me paqen fiskale, ne kemi parë draftin e fundit të Qeverisë. Vërejmë që Qeveria ka bërë përparim në forcimin e administrimit të të ardhurave, por disa elementë të propozimit mund të minojnë progresin e Shqipërisë në administrimin e tatimeve dhe të krijojnë disa risqe për drejtësinë”, deklaroi përfaqësuesja e FMN në Shqipëri, Anke Weber.
Pyetja: Cili është qëndrimi juaj për paqen fiskale dhe sa e shëndetshme iu duket për ekonominë?
Drejtuesja e FMN në Shqipëri, Anke Weber: Kemi parë draftin e fundit të paketës së propozuar për paqen fiskale. Vërejmë se qeveria ka bërë përparim të konsiderueshëm gjatë viteve të fundit në forcimin e administrimit të të ardhurave në përputhje me këshillat e FMN-së. Ne kemi frikë që disa prej elementeve të projekt-propozimit mund të minojnë progresin e fundit të Shqipërisë në administrimin e tatimeve dhe të krijojnë disa risqe për përmbushjen dhe për drejtësinë.
