Fondet e IPARD, Gonzato mesazh Ramës: Duam garanci që nuk do të vidhen më paratë tona

Ambasadori i Bashkimit Evropian në Shqipëri, Silvio Gonzato, ka komentuar situatën e fondeve IPARD.

Gonzato theksoi se pagesat janë pezulluar që nga fillimi i hetimit të OLAF-it, zyrës së pavarur të Komisionit Evropian që merret me dyshimet për mashtrim. Sipas tij, kjo erdhi pasi ata i marrin seriozisht rastet e abuzimt me paratë e taksapaguesve evropianë.

“OLAF ndërhyn kur ka dyshime për mashtrim. Ata bëjnë hetimet e tyre të pavarura dhe gjetjet e tyre janë konfidenciale. Kur vërtetohet se ka pasur mashtrim, nis një proces që përfshin shërbimet e Komisionit në Bruksel dhe vendin përfitues”, tha Gonzato në “Top Story”.

Ai shtoi se Komisioni Evropian e merr shumë seriozisht menaxhimin e parave të taksapaguesve, veçanërisht në vendet kandidate si Shqipëria. Ai pati një mesazh për qeverinë: “Komisioni pret garanci të mjaftueshme se janë vendosur mekanizma për të shmangur ngjarje të tilla në të ardhmen”.

Gjatë intervistës, Gonzato u pyet edhe për mundësinë që disa kompani të kenë kthyer fondet e mëparshme IPARD për shkak të shqetësimeve nga hetimi. Ambasadori u përgjigj se nuk është në dijeni të kësaj dhe nuk do ta komentonte.

-Ne e dimë që bujqësia është një nga tre sektorët që Shqipëria mund ta zhvillojë në një dimension të caktuar për të qenë, le të themi, me një avantazh krahasues në tregun evropian. IPARD është një nga testet dhe ilustrimet më të rëndësishme për të ecur përpara me standardet evropiane në sektorin e bujqësisë. Çfarë po ndodh me fondet IPARD? Pse ky hetim i asaj që është bërë më parë nga qeveria për fondet dhe shpërndarjen e tyre ka zgjatur kaq shumë dhe nuk e ka ndalur këtë? Apo kjo nuk është e saktë apo është vetëm një perceptim dhe ne nuk dimë shumë?

Ambasadori: Jo, jo. Siç thoni ju, pagesat janë pezulluar që nga fillimi i hetimit të OLAF-it. Siç e dini, OLAF është një zyrë e pavarur. Ajo ndërhyn kur ka dyshime për mashtrim. Ata bëjnë hetimet e tyre të pavarura. Ata kanë gjetjet e tyre. Janë të gjitha gjëra konfidenciale, e dini. Dhe pastaj, kur ata vërtetojnë se ka pasur mashtrim, kjo fillon një proces që përfshin, sigurisht, shërbimet e komisionit në Bruksel dhe vendin përfitues. Procedurat janë mjaft të vështira sepse kur flasim për paratë e taksapaguesve evropianë, Komisioni Evropian e merr këtë shumë, shumë seriozisht.

E merr seriozisht kur është një vend kandidat. E merr shumë seriozisht kur është edhe një shtet anëtar. Dhe komisioni ende pret të ketë garanci të mjaftueshme se janë vendosur mekanizma për të shmangur ngjarje të këtij lloji në të ardhmen. Në të ardhmen. Pra, dua të them, mashtrimi mund të ndodhë, por duhet të kesh kontrolle sistemike që sigurojnë që kjo të na japë siguri të mjaftueshme se situata ka ndryshuar.

j.l./ dita