Thonë që paraja nuk i zgjedh njerëzit, ama njerëzit mund të zgjedhin çfarë të bëjnë me paranë. Veçanërisht me atë lloj paraje që e posedon rastësisht. Njerëzit e mirë e dinë përherë zgjedhjen që duhet bërë në këto raste.
Ky shënim është pikërisht për një rast të tillë. Është një lajm i bukur për dy njerëz me shpirt të bukur, gjysh e nip.
Ata quhen Roland Agalliu dhe Rayan Hafesllari. Sot pasdite në rrugën Komuna e Parisit ata kanë gjetur në rrugë një portofol ku kishte para dhe dokumenta.
Portofoli i përkiste një punonjësi të gazetës DITA. Brenda tij ishte edhe karta identifikuese e gazetës. Duke u nisur prej saj, Rolandi i ka shkruar redaksisë në profilin tonë në Instagram dhe ka njoftuar se ka gjetur portofolin.
Ky ishte një lajm i gëzuar për pjesëtarin e stafit tonë, por mbi të gjitha është një shembull që frymëzon, nga ata shembuj të rrallë për të cilët kemi kaq shumë nevojë t’i vemë në dukje dhe t’i ndjekim.
Në takimin tonë, mësuam gjithashtu që Rayani 6 vjeçar këmbënguli veçanërisht që të kthehej portofoli.
Faleminderit i vogli Rayan, faleminderit zoti Roland.
Redaksia e Ditës
