Televizioni grek SKAY ka dërguar këto ditë në Tiranë një korrespodent për të ndjekur live seancën e dënimit të Belerit.
Emisioni i mëngjesit Atériasti ka bërë një lidhje live nga kryeqyteti shqiptar me gazetarin Kristos Xiunos.
Ndërkohë që Xiunos fliste për gjyqin ndaj Belerit, ndodh diçka e paparashikuar.
Një nga dy moderatorët e njohur të emisionit, nuk e ndërpreu lidhjen pas mbarimit të raportimit për Belerin, por i shprehu habinë gazetarit për pamjet nga Tirana që shfaqeshin live prapa tij.
Gazetari nga Tirana i përgjigjet “ke shumë të drejtë” dhe shton:
“Kam qenë para shumë vitesh në Tiranë por kjo që shoh këtë herë është e pakrahasueshme. Ka ndryshime të jashtëzakonshme, shoh një zhvillim të madh, ka gjithandej lëvizje dhe ndërtime, makina të reja, të rinj të veshur mirë, nuk ka të krahasuar kjo që shoh me Shqipërinë që njohim”.
Megjithëse flasin shpesh për shqiptarët, mediat greke japin shumë rrallë pamje të freskuara nga Shqipëria, duke përdorur arkivë të vjetëruar.
Zakonisht në lajmet greke Shqipëria prezantohet me nota negative ose nuk prezantohet me përjashtime politike si rasti i Belerit.
Aktualisht dy vendet kanë një ligj lufte që konsiderohet absurd por është ende në fuqi.
Më 28 tetor 1940, Italia i shpalli luftë Greqisë dhe e sulmoi territorin e saj përmes territorit shqiptar që e kishte pushtuar..
Më 10 nëntor 1940 shpallet dekreti mbretëror grek nr. 2636 “mbi veprimet juridike të armiqëve dhe konfiskimin konservativ të pasurive armike”. Në bazë të këtij ligji, pasuritë e shqiptarëve anembanë Greqisë u vunë nën sekuestrimin konservativ nga shteti grek.
Më 28 gusht 1987, qeveria greke vendos për heqjen e ligjit të luftës, mirëpo nuk r botoi kurrë në gazetën zyrtare.
Kronika nga Tirana e emisionit të njohur të kanalit SKAY mund të shihet duke klikuar KËTU, rreth minutave 14-18
n.s. / dita
