FOTO: Katër turistë gjermanë bllokohen në Kanionin e Langaricës, Spathara: Masa urgjente, është shumë i rrezikshëm!

Katër turistë gjermanë kanë rrezikuar jetën sot pasdite në Kanionin e Langarices në Përmet.

Burime lokale thanë për DITA se katër të huajt janë shpëtuar falë ndërhyrjes së shpejtë të Komisariatit të Policisë Përmet dhe stafit të Zjarrfikëses.

Në operacionin e shpëtimit u angazhuan edhe instruktorët e Federatës Shqiptare të Rafting.

Kreu i kësaj Federate, eksperti i njohur i rafting, Zamo Spathara tha për media se Kanioni i Langaricës është krejtësisht i paparashikueshëm kur ka rreshje shiu.

“Të eksplorosh këtë kanion pa pajisjet e duhura dhe pa një guidë profesionale është shumë e rrezikshme” – shtoi ai.

Spathara apelon ndalimin e hyrjes së pakontrolluar në kanion dhe vendosjen e një tabele paralajmëruese, veçanërisht për turistët e huaj:

Duhet theksuar se brenda një muaji, kjo është e dyta herë që turistë të huaj rrezikojnë jetën në këtë kanion, ndaj situata ka nevojë serioze për vëmendjen e shtuar të Ministrisë, përpara se të përballemi me ngjarje fatale.

Edhe Policia ka reaguar mbi ngjarjen duke theksuar se turistët e huaj mbetën të bllokuar për shkak të rritjes së nivelit të ujit në Langaricë nga reshjet e shiut.

“Shërbimet e Komisariatit të Policisë Përmet, në bashkëpunim me shërbimet zjarrfikëse dhe punonjësit e Agjencisë Kombëtare të Zonave të Mbrojtura, kanë kontrolluar të gjithë zonën dhe kanë bërë të mundur lokalizimin e turistëve, në Kanionin e Langaricës.

U bër e mundur nxjerrja e 4 turistëve nga terreni i vështirë ku ishin bllokuar. Atyre më pas, u është ofruar asistenca mjekësore dhe aktualisht ndodhen në gjendje të mirë shëndetësore.

Gjithashtu, Federata Shqiptare e Rafting ofroi mbështetje me pajisje të posaçme për ndërhyrjen në këto zona. DVP Gjirokastër fton qytetarët që për çdo rast nevoje për ndihmë të telefonojnë në numrin pa pagesë 112” – thotë komunikata e policisë.

Më poshtë pamje të marra pas shpëtimit të grupit të turistëve gjermanë:

i.b. / dita