Nga Dori Xhima
Lojë me vdekjen në qiell, në mbi 10 mijë metra lartësi. Si u parandalua tragjedia në bordin e “Flydubai” pas sulmit ndaj pilotit
Në një prej ngjarjeve më dramatike të aviacionit civil të viteve të fundit, pasagjerët dhe eipazhi i një fluturimi të kompanisë “Flydubai” parandaluan një katastrofë të mundshme ajrore.
Ngjarja ndodhi gjatë fluturimit FZ1073 nga Dubai drejt Tel Avivit, kur një sulm i përgjakshëm shpërtheu brenda kabinës së pilotimit.
Sipas dëshmive dhe raporteve zyrtare, një përleshje me thikë ndodhi fillimisht brenda kabinës ku bashkëpiloti goditi kapitenin e avionit, Indianin Smit Machchhar me qëllim për të marrë kontrollin e plotë të avionit.
Si pasojë e sulmit dhe humbjes së kontrollit për disa momente, avioni pësoi një rënie të menjëhershme prej rreth 5,000 metrash (16,000 feet) brenda vetëm dy minutave, duke shkaktuar panik të jashtëzakonshëm në kabinën e pasagjerëve.
Pavarësisht plagëve të marra dhe gjakderdhjes kapiteni Machchhar arriti të zhbllokonte nga brenda derën e blinduar të kabinës së pilotimit.
Ndërhyrja e pasagjerëve
Hapja e derës u mundësoi disa pasagjerëve dhe anëtarëve të ekuipazhit të ndërhynin me shpejtësi. Ndër pasagjerët që u futën për të neutralizuar bashkëpilotin agresor ishte edhe një pilot jashtë shërbimit, një mjek dhe profesionistë të tjerë që ndodheshin në bord. Ata arritën të rimerrnin kontrollin e mjetit fluturues.
Avioni bëri një ulje emergjente në aeroportin e Tabukut në Arabinë Saudite. Të 174 pasagjerët dhe ekuipazhi shpëtuan, ndërsa kapiteni dhe autori u dërguan me urgjencë për ndihmë mjekësore.
Reagimet ndërkombëtare
Kryeministri i Indisë Narendra Modi dhe autoritete nga Izraeli e Emiratet e Bashkuara Arabe e cilësuan kapitenin Machchhar dhe pasagjerët si heronj të vërtetë që parandaluan një tragjedi masive me sfond të mundshëm terrorist. Netanjahu u shpreh madje se u parandalua një 11 shtator i dytë.
Bashkëpiloti, autor i sulmit është identifikuar si shtetas me origjinë nga Omani. Ai ndodhet nën hetim nga autoritetet saudite për të sqaruar motivet e plota të këtij akti.
DITA
