Shërbimi Federal i Sigurisë së Rusisë (FSB) ka publikuar një video të autores së dyshuar të sulmit vrasës ndaj vajzës së Aleksandër Duginit, Darya Dugina.
Videoja në fjalë tregon 43-vjeçaren ukrainase Natalya Vovk.
Daria Dugina, gazetare dhe politologe u vra mbrëmjen e 20 gushtit. Ajo po drejtonte makinën e babait të saj, e cila shpërtheu në një autostradë në rajonin më të madh të Moskës.
FSB pretendon se krimi ishte planifikuar dhe kryer nga shërbimet speciale ukrainase dhe autorja Vovk hyri në Rusi më 23 korrik me vajzën e saj 12-vjeçare, duke marrë me qira një apartament në të njëjtën ndërtesë ku jetonte Dugina.
Vovk e ndoqi viktimën e saj duke përdorur një Mini Cooper, i cili fillimisht mbante targa “Republika Popullore e Donetskut”, të cilat ajo i ndryshoi më pas në targa Kazakistani.
Pak orë pas shpërthimit, 43-vjeçarja kaloi në Estoni me targa ukrainase, sipas hetimit të FSB-së.
Ditën e vrasjes, Vovk dhe vajza e saj ishin në një festival ku ndodhej edhe Dugina. Pasi u largua nga aktiviteti, Vovk duket se ka shpërthyer fuoristradën Toyota Land Cruiser Prado të drejtuar nga gruaja ruse. Pas kësaj, Vovk dhe vajza u nisën për në Estoni.
Sipas informacioneve, 43-vjeçarja ukrainase ka shërbyer më parë në Batalionin Kombëtar Azov dhe emri i vajzërisë së saj është Shaban.
Presidenti rus Vladimir Putin e quajti vdekjen e Duginas një “krim të neveritshëm”.
“Një krim i neveritshëm, mizor preu fillin e jetës së Daria Dugina, një person i shkëlqyer, i talentuar, me një zemër të vërtetë ruse, e sjellshme, e dashur, e dhembshur dhe e hapur. Gazetare, shkencëtare, filozofe, korrespondente lufte, ajo i shërbeu popullit dhe atdheut me ndershmëri, duke dëshmuar me veprimet e saj se çfarë do të thotë të jesh patriot i Rusisë ”, thuhet në telegramin e ngushëllimit që presidenti rus i dërgoi të hënën familjes së Daryas.
Nga ana e saj, Ukraina ka mohuar çdo përfshirje në vdekjen e saj.
j.l./ dita
