Funerali i Mbretëreshës,i cili do të mbahet të hënën, do të jetë një nga tubimet më të mëdha të familjes mbretërore dhe politikanëve të organizuar në Mbretërinë e Bashkuar për dekada.
Ftesat u bënë gjatë fundjavës, me rreth 500 krerë shtetesh dhe personalitete të huaja që pritet të marrin pjesë.
Shumica e liderëve u është kërkuar të mbërrijnë me fluturime komerciale dhe u është thënë se do të transportohen masivisht me autobus nga një zonë në perëndim të Londrës.
Ceremonia do të mbahet në Westminster Abbey, me një kapacitet diku rreth 2200 njerëz.
Por, kush do të jetë i pranishëm dhe kush jo?
Familjet mbretërore evropiane
Mbreti Philippe i Belgjikës dhe Mbretëresha Mathilde kanë konfirmuar se do të jenë, ashtu si edhe Mbreti Willem-Alexander dhe gruaja e tij, Mbretëresha Maxima, së bashku me nënën e tij, ish-mbretëresha holandeze, Princesha Beatrix.
Mbreti Felipe dhe Mbretëresha Letizia e Spanjës kanë pranuar gjithashtu ftesën, ashtu si edhe familjet mbretërore të Norvegjisë, Suedisë dhe Demarkës.
Presidenti i SHBA
Shtëpia e Bardhë ka konfirmuar se presidenti Joe Biden do të marrë pjesë së bashku me Zonjën e Parë Jill Biden, edhe pse mendohet se ata nuk do të udhëtojnë me autobus.
Liderë të tjerë botërorë
Udhëheqës të tjerë botërorë që thuhet se kanë pranuar ftesat përfshijnë kryeministrin irlandez Micheal Martin, presidentin gjerman Frank-Walter Steinmeier dhe presidentin italian Sergio Mattarella si dhe Presidenten e Komisionit Evropian Ursula von der Leyen.
Presidenti i Koresë së Jugut Yoon Suk-Yeol dhe ai brazilian Jair Bolsonaro kanë konfirmuar gjithashtu pjesëmarrjen e tyre.
Udhëtimi pritet të bëhet edhe nga perandori japonez Naruhito, presidenti turk Rexhep Tajip Erdogan dhe presidenti francez Emmanuel Macron.
Nuk dihet nëse presidenti kinez Xi Jinping, vizitat e të cilit në Kazakistan dhe Uzbekistan këtë javë do të shënojnë herën e parë që ai largohet nga Kina që nga fillimi i pandemisë Covid-19, do të marrë një ftesë apo do ta pranonte atë.
Republika Islamike e Iranit, prej kohësh subjekt i sanksioneve ndërkombëtare për programin e saj bërthamor, do të përfaqësohet vetëm në nivel ambasadori, thanë burimet e Whitehall.
I pa ftuar
Asnjë përfaqësues nga Rusia, Bjellorusia apo Mianmari nuk është ftuar, thotë James Landale i BBC-së.
Marrëdhëniet diplomatike midis Mbretërisë së Bashkuar dhe Rusisë janë shembur që nga pushtimi rus i Ukrainës dhe një zëdhënës i presidentit rus Vladimir Putin tha javën e kaluar se ai “nuk po e konsideronte” pjesëmarrjen në funeral.
a.m/dita
