Nga Nensi Bogdani
Është fillim gushti dhe temperaturat janë të larta, por rrugët e Tiranës janë të mbushura nga grupet e turistëve të huaj që po vizitojnë kryeqytetin. Sipas të dhënave të Institutit të Statistikave, vera e këtij viti e ka rikthyer turizmin në nivele të larta, pas një rënie të konsiderueshme dy-vjeçare për shkak të përhapjes së pandemisë së COVID-19.
Sipas INSTAT, 876.056 shtetas të huaj hynë në territorin shqiptar në muajin qeshor – duke shënuar një rritje me 45% krahasuar me qershorin e një viti më parë. Gjashtëmujori i parë i këtij viti ka regjistruar shtetasit grekë si ata me rritjen më të lartë, ndërsa shtetasit kosovarë kanë shënuar rritjen më të ulët me 12.6%.
Arsyet e udhëtimit të shtetasve të huaj në Shqipëri lidhen kryesisht me turizmin dhe sezonin e pushimeve, të ndjekur nga ata që vijnë për kalim tranzit dhe më pas ata që udhëtojnë për arsye biznesi apo profesionale.
Grupet e turistëve kanë preferenca të ndryshme në mënyrën se si e organizojnë qëndrimin në Tiranë. Disa prej tyre janë të organizuar në grupe të drejtuara prej guidash lokale, ndërsa të tjerët eksplorojnë në mënyrë të pavarur pikat turistike të Tiranës.
Kryesisht, vizitorët e huaj frekuentojnë sheshin “Skënderbej” dhe bulevardin “Dëshmorët e Kombit”, si edhe pedonalen apo Katedralet dhe Xhamitë e Tiranës.
