Kryeministri i Kosovës Albin Kurti vizitoi Tiranën këtë të dielë ku u prit nga përfaqësuesit e lartë të shtetit shqiptar.
Në takimin me presidentin Bajram Begaj, Kurti foli për negociatat me Serbinë, ndërsa vijoi takimet në kryesinë e kuvendit ku u prit nga kryetarja e parlamentit Lindita Nikolla, dhe një bisedë më të gjatë pati kokë më kokë me kryeministrin Rama në vilën qeveritare.
“I shpreha Albinit të gjithë simpatinë time për kurajon dhe realizimin me të cilin ka hedhur hapa me rëndësi të madhe drejt normalizimit të marrëdhënieve me Serbinë. E inkurajova kryeministrin në hedhjen e hapave të mëtejshëm, qoftë për garantimin e komunave serbe në kornizën e asociacionit që garanton vetëmenaxhimin e komunitetit serb, qoftë për funksionimin me garancitë e nevojshme të Kishës Serbe në vendet e saj të kultit në Kosovë, duke e siguruar se në këtë proces jo të lehtë ka mbështetjen time të plotë”, tha Rama.
“Kam besimin se zotimi i marrë nga palët në Ohër do të respektohet plotësisht, ndërkohë do të gjenden mekanizmat e duhur për ta kthyer këtë dakordësim publik në një marrëveshje të detyrueshme për palët ndërkombëtarisht”, tha Begaj.
Nga ana tjetër kryeministri Kurti theksoi vendosmërinë e qeverisë së Kosovës për të cuar përpara dialogun me Serbinë dhe dha sigurinë për zbatimin e planit europian.
Ndër të tjera, u njoftua se kjo vizitë do të pasohet me mbledhjen e ardhshme të dy qeverive në qershor.
l
m.b. / dita
