Kreu i Partisë së Lirisë Ilir Meta jo vetëm që ka njohje me shqiptaro-amerikanin Agron Neza por edhe janë takuar dhe kanë darkuar së bashku, në shoqërinë dhe të ish-agjentit të FBI-së, Mark Rossini.
Emisioni “TOP STORY” ka publikuar foton që kompromenton Metën dhe që është bërë në vitin 2013 në restorantin “Sofra e Ariut” në Tiranë.
Kjo foto rrëzon deklaratat e Ilir Metës që nuk e njihte ish-agjentin e Shërbimit Sekret Shqiptar, Agron Nezën.
Interesant është edhe fakti që darka është organizuar pak kohë pasi është prishur koalicioni qeveritar mes Sali Berishës dhe Ilir Metës dhe më pas kreu aktual i Partisë së Lirisë kaloi në aleancë me Edi Ramën.
Më vonë, në 2018, Mark Rossini dhe Charles McGonigal, në bashkëpunim me shqiptaro-amerikanin Agron Nezaj që në dosje është ‘Personi A’ dhe Shefqet Dizdarin hapën një studio ligjore të quajtur ‘Law Office and Investigation’ në Shqipëri.
Një tjetër fakt interesant është dhe prania ne tavolinë e ish-këshilltarit të Edi Ramës, Dorian Duçka. Ky i fundit është sulmuar ditën e fundit nga çifti Meta-Kryemadhi. Por duket se Meta ka ‘harruar’ që ka qenë në tavolinë me Duçkën, bashkë me agjentë të FBI-së, si dhe investitorë kinezë. Ndoshta mendonte që kjo foto nuk ekzistonte.
Ndërkohë, një personazh tjetër kontrovers në këtë foto është edhe biznesmeni kinez Patrick Ho që është në foto përballë Metës.
Biznesmeni kinez u dënua me tre vite burg në dhjetor të 2018 nga një gjykate amerikane në Nju Jork.
Ai u dënua për ryshfet ndërkombëtar dhe pastrim parash për rolin e tij në një skemë shumëvjeçare, shumëmilionëshe për të korruptuar zyrtarët e lartë të Çadit dhe Ugandës në këmbim të avantazheve për CEFC China Energy Company Limited (“CEFC China”).
m.b/dita
