Influenca ruse në Ballkan qoftë edhe nëpërmjet financimeve të partive ka detyruar Komisionin Qendror të Zgjedhjeve ti drejtohet zyrtarisht Parlamentit, për të ndryshuar nenet e Kodit Zgjedhor.
KQZ i ka dërguar shkresë Kuvendit për disa rekomandime të pjesshme për ndryshime të kuadrit ligjor zgjedhor. Në mesin e 3 rekomandimeve përfshihen dhe rregullat e financimit të fushatës zgjedhore.
“Duke qenë se koha në dispozicion për zgjedhjet e radhës nuk lejon ndryshime themelore dhe mundësi për zbatimin e tyre, sugjerojmë të konsideroni për momentin rekomandimet vijuese: a. Të përcaktohen rregulla për pasqyrimin e fushatës zgjedhore në median në internet (online), në rrjetet sociale dhe në median e shkruar.b.Të përcaktohen rregulla në lidhje me financimin dhe fushatën e subjekteve të identifikuara si “palë të treta“”, thuhet në shkresën e KQZ-së.
Raporti i agjencisë amerikane i dalë fundmi se Moska kishte financuar 300 milionë usd dhe përmendte se Partia Demokratike kishte përfituar 500 mijë usd në vitin 2017.
Pikërisht ky alarm i lëshuar përtej Altantikut bëri që ambasadorja amerikane në Tiranë, Yuri Kim të zhvillonte një takim urgjent në KQZ me kryekomisionerin Ilirjan Celibashi dhe përfaqësuesit e partive kryesore politike. Më pas Kim pati edhe takime në Kryesinë e Kuvendit, ku primare kishte ndryshimet në ligjin zgjedhor.
Propozimet e tjerë të KQZ-së
Komisioni Qendror i Zgjedhjeve kërkon që ndryshimet e Kodit Zgjedhor të bëhen dy tre muaj përpara zgjedhjeve lokale. Pra sipas kësaj llogaritje, Kuvendit i kërkohet që ato të miratohen deri në janar apo në shkurt.
Ndër propozimet e tjera të KQZ-së lidhen edhe ai i përdoret të aseteve të administratës publike në fushatat zgjedhore. “Të përcaktohet në mënyrë shteruese (nëpërmjet përkufizimit/ve) çfarë duhet të jetë e ndaluar për funksionarët publik në kuadër të fushatës zgjedhore, si dhe mekanizmat për verifikimin nga KQZ mbi përdorimin e aseteve publike dhe veprimtarinë e institucioneve publike”, thuhet në letrën e KQZ-së.
Mënyra dhe forma e organizimit dhe e funksionimit të komisioneve të qendrave të votimit (KQV) të komisioneve zonale të administrimit zgjedhor (KZAZ), si dhe e grupeve të numërimit (GN) duket se është një tjetër shqetësim për KQZ-në.
Me propozimin e tyre ky institucion ka si qëllim që të paktën në aspektin formalo-teknik të kemi një administrim më të mirë të procesit zgjedhor nga komisionet e niveleve të dyta dhe të treta.
“Përmirësimet që ne nxisim në lidhje me këtë aspekt, jo domosdoshmërisht ato duhet, apo mund t’i zhveshin partitë nga të drejtat që ato kanë sot në administrimin e zgjedhjeve, përfshi këtu edhe të drejtën për vendim-marrjen nga përfaqësuesit e tyre në këto komisione”, thuhet në letrën e KQZ. Më konkretisht sugjerohet që partitë të mos të kenë të drejtën e komisionerëve vendimmarrjes të plotë në nivelet e dyta apo të treta të komisioneve dhe të numërimit të votave, duke propozuar një formulë mikse mes partive dhe KQZ-së, ku vendimmarrjen ta ketë ky institucion.
o.j/dita
