Me afrimin e festave të fundvitit shtohen dhe veprimtaritë kriminale kundër pronës dhe personit.
Të tilla janë ngjarjet e fundit në Tiranë ku dy persona u grabitën në sheshin Skënderbej nga dy 17 vjeçarë, me pistoletë lodër.
Grabitja ka ndodhur në orën 3 të mëngjesit së ditës së djeshme. Paratë e vjedhura u gjetën, njofton policia, së bashku pistoletën imituese, si dhe biçikletën të cilën autorët kanë përdorur për t’u larguar nga vendi i ngjarjes. Një prej tyre është kapur dhe tjetri po kërkohet.
Ndërsa mbrëmjen e së shtunës, policia ndërhyri në duke parandaluar një grabitje në fshatin Prush të Tiranës. Tre personat e armatosur, kanë qëlluar me armë ndaj policisë që është kundër përgjigjur. Autorët janë larguar dhe janë ende në kërkim.
Policia e Shtetit njofton se do të rrisë vigjilencën gjatë kësaj periudhe për të penguar të gjithë ata që duan të shfrytëzojnë atmosferën festive, për të kryer vepra kriminale ndaj njerëzve dhe pronës.
“Policia e Shtetit do të rrisë vigjilencën gjatë festave të fundvitit, ndërsa elementë të caktuar kriminalë tentojnë ta shfrytëzojnë këtë periudhë të vitit për veprimtaritë e tyre kriminale kundër pronës dhe personit. Policia e Shtetit ka arrestuar autorin e një grabitjeje në Tiranë dhe ka ndërhyrë në kohë për të parandaluar një tjetër në fshatin Prush. Gjatë natës së mbrëmshme policia dhe prokuroria kanë avancuar drejt identifikimit dhe arrestimit të personave të përfshirë në këtë ngjarje”, konfirmon ministri i Brendëshëm,Taulant Balla, në një postim të bërë në rrjetin social Facebook.
p.k\dita
