Drejtuesi jetëgjatë i “Fiks Fare”, Filip Çakuli, pritet të largohet nga drejtimi i emisionit, duke shënuar një ndryshim të rëndësishëm në një prej programeve më jetëgjata të gazetarisë investigative në Shqipëri.
Bashkë me Çakulin pritet të largohen edhe moderatorët Julian Deda dhe Xhemi Shehu, ndërsa ndryshimet do të prekin edhe drejtimin gazetaresk të programit.
Kryeredaktorja aktuale, Denisa Haxhiaj, do të largohet nga detyra dhe, sipas burimeve, në vend të saj pritet të emërohet gazetarja veterane e “Fiks Fare”, Antela Lika.
Ende nuk janë bërë të ditur emrat e dy moderatorëve që do të marrin drejtimin e programit. Burime për Vox News bëjnë me dije se zgjedhjet kryesore pritet të bëhen brenda stafit të Top Channel.
Largimi i Filip Çakulit pas një periudhe kaq të gjatë në drejtimin e “Fiks Fare” shënon fundin e një epoke për emisionin, i cili gjatë 25 viteve të transmetimit është kthyer në një prej emisioneve më të njohura të gazetarisë investigative në vend.
Për momentin, mbetet e paqartë edhe se cili do të jetë roli i Filip Çakulit në Top Channel pas largimit të tij nga drejtimi i “Fiks Fare”.
n.s. / dita
