Një nga parrullat e protestuesve është: “Parti Demokratike, kush të bleu dhe sa iu shite?”. Shkrimtari Kim Mehmeti thotë se përgjigjja është shumë e thjeshtë:
“Atë e ‘blenë’ dhe e shndërruan në pronë të tyren të gjithë ata që pretendojnë se i ‘shërbejnë’ PD-së dhe popullit, por që, në të vërtetë, mbushin xhepat e tyre” – shkruan ai.
Mehmeti shton se protestat studentore dhe të rinisë shqiptare në Tiranë “ose do ta pastrojnë vendin nga plehu politik i më shumë se tri dekadave, që e ka kalbur Shqipërinë, ose do të dëshmojnë se nga kullosa e keqe, që e ka mbuluar mëmëdheun tonë, nuk ka ku të mbillet fara e demokracisë”.
“Rama ka zgjedhur të plaket me fytyrën e turpit dhe të tradhtarit dhe nëse Berisha do donte vërtetë që ai të ikte nga pushteti, ai do duhet të dilte përpara rinisë që proteston dhe t’u thoshte: ‘unë do tërhiqem dhe do t’jua lehtësoj rrugëtimin drejt rrëzimit të tij” – thotë Mehmeti.
Shkrimtari që jeton dhe punon në Shkup e që shkruan rregullisht për ngjarjet aktuale politike në Maqedoninë e Veriut, Shqipëri dhe Kosovë, shkruan se duke mos e bërë këtë, Berisha ia ka nënshkruar vetes fatin që të mos mund ta ndash atë nga fatkeqësia e sotme që po përjeton Shqipëria:
“E pamundur të besosh se një politikan me përvojën e tij politike nuk e din se, duke i përkrahur protestuesit dhe duke i thirrur deputetët e PD-së të dalin në protesta, në të vërtetë i dobëson ato dhe e forcon Ramën. Nuk është larg së vërtetës pohimi se ‘pronarëve’ të PD-së nuk u shkon për shtati rënia e Ramës. Nuk e duan rënien e tij, sepse pa të do të do të mbeteshin lakuriq dhe andaj përderisa Rinia kërkon ndryshim, ata kërkojnë shpëtim për vetveten”- shkruan ai
o.p. / dita
