Për infermierinë, provimet për licencat e reja profesionale do të nisin javën e ardhshme. Si shkak i numrit të madh të kandidatëve që garojnë në këtë sezon për të fituar lejen e ushtrimit të profesionit, provimet për këtë profil do të vijojnë për dy javë me rradhë, sipas grafikut të përcaktuar.
Qendra e Shërbimeve të Arsimit bën me dije se janë 1721 kandidatët që do të konkurojnë nëpërmjet provimit të shtetit për të siguruar licencën profesionale në këtë profil, marrja e të cilit, i hap udhë punësimit në strukturat mjekësore. Për secilin kandidat që është pjesë e listës së publikuar në vijim të shkrimit, janë detajuar tashmë data dhe ora specifike se kur duhet të paraqiten në ambientet e Qendrës së Shërbimeve të Arsimit për të zhvilluar provimin e informatizuar. Ekspertët këshillojnë çdo kandidat të listës, të vlerësojë me kujdes oraret e përcaktuara specifikisht për ta, pasi në të kundërt nuk do të mund të japin provimin në një tjetër afat përgjatë këtij sezoni.
Sa i takon rregullave të përcaktuara, në ditën e provimit kandidati duhet të paraqitet pranë Qendrës së Shërbimeve të Arsimit 30 minuta përpara orarit të nisjes së provimit, teksa duhet të jetë i pajisur me Kartë ID ose Pasaportë (dokumenti origjinal) dhe kopje të tyre, faturën origjinale me vulën përkatëse të pagesës së tarifës së provimit të kryer në një bankë të nivelit të dytë bazuar në herën e pjesëmarrjes, si dhe një maskë mbrojtëse. Mungesa e një prej këtyre dokumenteve ju penalizon duke ju lënë jashtë testimit, çka do të thotë se duhet të prisni sezonet e tjera për të hyrë sërish në testin e licencës, duke humbur kështu shanset për të aplikuar përgjatë kësaj periudhe për vendet e lira të punës në spitalet dhe qendrat mjekësore publike dhe private në vend. Për të qenë kalues në këtë provim duhet të siguroni mbi 50 pikë me përgjigjet e dhëna.
Në ndihmë të kandidatëve që do testohen në këto tre profile përgjatë këtij sezoni, Qendra e Shërbimeve të Arsimit ka detajuar edhe fondin e mijëra pyetjeve nga të cilat do të përzgjidhen edhe pyetjet që do të jenë pjesë e tezës së provimit të licencës. Kështu, çdo kandidat mund të orientohet rreth përmbajtjes që do të ketë testi i licencës, duke u njohur me fondin e detajuar të pyetjeve që gjendet në faqen online të Qendrës së Shërbimeve të Arsimit.
