Spiunazhi rus, operacion i madh në Malin e Zi, publikohen lidhje dhe emra: Në raportin e CIA, edhe Berisha, ja oligarku rus që financon në Shqipëri

Mediat e Malit të Zi kanë zbuluar detaje të hollësishme të operacionit që prej ditësh po vepron në Mal të Zi, ku është goditur një celulë e spiunazhit rus.

Sipas gazetës së Podgoricës ‘Pobjeda’, kjo celulë ishte edhe operative, por edhe një “bankë” nga ku ndaheshin paratë për të vepruar në shtete të tjera të Ballkanit, si Bosnjë dhe Hercegovinë, Kosovë, Shqipëri e Maqedoninë e Veriut.

‘Pobjeda’ raporton se çdo lëvizje e bënte ambasada e Rusisë.

Sipas gazetës, kryeministri i Malit të Zi, Dritan Abazoviç ka urdhëruar nisjen e operacionit, menjëherë sapo është kthyer prej SHBA, ku ka patur takime me drejtues të CIA.

Janë arrestuar 38 persona, vetëm dy prej të cilëve janë malazezë, ndërkohë që nuk bëhet e ditur se çfarë kombësie kanë 36 personat e tjerë. Ka të dhëna, që ndër të arrestuarit ka edhe shqiptarë. Dy shtetasit malazezë deri tani të identifikuar janë Radomir Sekuloviç, diplomat në pension si dhe një person tjetër me banim në Podgoricë, i cili nuk është i punësuar në shtet, por ka një kompani biznesi private.

6 diplomatë rusë u shpallën ‘non grata’ po dje nga qeveria e Abazoviç. Gazeta e Podgoricës thekson se operacioni është kryer nën asistencën direkte të CIA-s dhe shërbimit sekret britanik MI6 dhe për të kanë pasur dijeni vetëm tre persona: Kryeministri Dritan Abazoviç, shefi i shërbimit sekret që emëroi ky i fundit dhe ministri i Brendshëm, gjithashtu i emëruar nga URA.

Për operacionin nuk ka pasur dijeni as presidenti i Malit të Zi Milo Gjukanoviç e megjithatë që në nisjen e tij, ka pasur rrjedhje informacioni. Disa persona të implikuar janë larguar menjëherë nga ambasada ruse në rrugën “Beogradska” në Podgoricë me dy çanta që nuk dihet çfarë kanë pasur brenda.

Ambasada ruse, menjëherë pas operacionit, ka shpallur pezullimin e aktivitetit konsullor.

‘Pobjeda’ në shkrimin e saj bën të ditur edhe pjesë nga informacioni i shërbimeve amerikane mbi influencën ruse në politikën e Malit të Zi, Bosnjës dhe Shqipërisë. Pobjeda, thekson se njerëzit e kontaktit të Moskës në Ballkan janë Milorad Dodik dhe Sali Berisha.

Gazeta malazeze thekson ndër të tjera se miliarderi rus Konstantin Malofejev është ai që ka shpërndarë para në Mal të Zi, Bosnjë dhe Shqipëri.

SHBA, ndërkaq ka bërë të ditur se shefi i operacionit për trazirat në Ballkan ka qenë Oleg Deripaska një oligark rus, si dhe ekzekutori ishte Viktor Alexeyevich Boyarkin një oficer në rezervë i shërbimit sekret ushtarak GRU.

Inteligjenca amerikane thekson në raportin e saj se Boyarkin vepronte në emër të Deripaskës me 15 anëtarë të tjerë të GRU. Janë këta, sipas raportit, që tentuan të rrëzojnë qeverinë e Malit të Zi dhe armët e përfshira në këtë tentativë, janë blerë në Shkodër.

Ky operacion mbetet ende nën siglën ‘Top Secret’, por Pobjeda thekson se pas agresionit rus kundër Ukrainës më 24 shkurt të këtij viti, situata gjeostrategjike ka ndryshuar në mënyrë dramatike, gjë që ka çuar në intensifikimin e aktiviteteve të agjencive perëndimore të inteligjencës. Këto të fundit kanë filluar të veprojnë në mënyrë të koordinuar përballë mundësisë që ndikimi rus në Ballkanin Perëndimor të çojë në trazira të mëdha politike.

Siç bën të ditur ‘Pobjeda’, Moska zyrtare ka bërë të ditur se do të japë një përgjigje të fortë pas shpalljes ‘Non Grata’ të 6 diplomatëve rusë. Ministri i Punëve të Brendshme të Malit të Zi, Filip Axhiç, deklaroi për mediat pas operacionit, se po bëjnë gjithçka për ta pastruar vendin nga ndikimet e huaja.

Kjo situatë nuk i ka shpëtuar luftës së brendshme politike në Mal të Zi. Ministri i Mbrojtjes Konjeviç ka deklaruar se “kur të mësojë se kush janë njerëzit të cilëve u është hequr liria dhe me kë janë në marrëdhënie, ministri i Brendshëm mund të ndryshojë mendje”.

Aludimi i tij ka të bëjë me dyshimet se gruaja e të dyshuarit Sekuloviq, është në listën e këshilltarëve të Urës për zgjedhjet në Podgoricë. Por për këtë Kryeministri Dritan Abazoviç ka deklaruar se “nuk do të kursehet askush”.

o.j/dita