Në Ghana janë konfirmuar dy rastet e para të virusit vdekjeprurës Marburg, i cili është shumë infektiv dhe përfshihet në të njëjtën familje me virusin që shkakton Ebola.
Referuar autoriteteve të atjeshme, dy pacientët e infektuar kanë ndërruar jetë në spital në rajonin jugor të Ashanti-t.
Në fillim të këtij muaji, testet e tyre dolën pozitive dhe tani janë verifikuar nga një laborator në Senegal.
Zyrtarët shëndetësorë në vendin e Afrikës Perëndimore kanë treguar se 98 persona janë në karantinë si raste të dyshuara kontakti.
Ende nuk ka ndonjë trajtim për Marburg. Por për mjekët, pirja e shumtë e ujit dhe trajtimi i simptomave specifike përmirëson shanset e pacientit për të mbijetuar.
Virusi transmetohet te njerëzit nga lakuriqët e natës dhe përhapet mes njerëzve përmes transmetimit të lëngjeve trupore.
Është një sëmundje e rëndë, shpesh fatale, me simptoma të tilla si dhimbje koke, ethe, dhimbje muskulore, të vjella dhe gjakderdhje.
Zyrtarët po paralajmërojnë njerëzit që të qëndrojnë larg shpellave dhe të gatuajnë tërësisht të gjitha produktet e mishit përpara se t’i konsumojnë ato.
Në Afrikë, shpërthime të mëparshme dhe raste sporadike janë raportuar në Angola, Republikën Demokratike të Kongos, Kenia, Afrikën e Jugut dhe Ugandë.
Shpërthimi i parë i Marburg-ut ka qenë në Gjermani në vitin 1967 ku ndërruan jetë shtatë persona.
Virusi vrau më shumë se 200 njerëz në Angola në vitin 2005, shpërthimi më vdekjeprurës i regjistruar sipas organit global të shëndetit.
Marrë nga “BBC”
a.m/dita
