Shumë gola për një pikë në Laçi-Erzeni. Në sfidën e vlefshme për javën e parë të kampionatit, kurbinasit dhe shijakasit ndanë nga një pikë falë barazimit spektakolar 3-3, duke treguar se sulmet respektive funksionojnë mirë, por mbrojtjet kanë ende punë për të bërë.
Laçi e nisi vrullshëm ndeshjen dhe mori avantazhin me Sobowale në minutën e 12’, megjithatë Erzeni u kundërpërgjigj me një kurbinas si Redon Mihana, i cili shënoi një gol spektakolar dhe riktheu baraspeshën në minutën e 21-të.
Në minutën e 30’ ishte Bajramaj që u dha avantazhin bardhezinjve dhe më pas në të 62-tën Serxo Ujka shënoi edhe të tretin për Laçin duke dhënë idenë e një fitoreje bindëse për kurbinasit, por nuk ndodhi kështu.
Erzeni rihapi takimin me Redon Mihanën në minutën e 82-të dhe në të 88-ën riktheu baraspeshën me në të Kahrimanovic, duke marrë një pikë në këtë start të sezonit, në një transfertë të vështirë si ajo ndaj Laçit.
