Nën kalldrëmet e pazarit karakteristik, në zonën më të frekuentuar të Gjirokastrës, pas bashkisë, fshihet një nga sekretet më të mëdha të periudhës komuniste. Një tunel i ndertuar për mbrojtje nga sulmet bërthamore është kthyer në muze.
Ky tunel u ndërtua në vitet ’70. Agjencia e Trashëgimisë Kulturore e ka kompletuar me dokumente, shtypin e kohës, etj. Në brendësi janë ekspozuar uniformat që u përkisnin strukturave të ndryshme, duke nisur nga ato ushtarake e deri te pardesytë e famshme gri, të cilat janë të gjitha origjinale.
Nuk mungon as portreti i Enver Hoxhës, i cili mbështeti idenë e ndërtimit të dhjetëra bunkerëve dhe tuneleve për mbrojtje në mbarë vendin.
Koordinatorja e muzeut, Albana Ismaili, e shpjegon kështu:
“Gjatë guidave brenda në tunel u flasim turistëve për periudhën e luftës dhe pas luftës. Duke qenë se ai ishte strateg i luftës, gjithashtu edhe udhëheqësi i popullit shqiptar për 40 vite pas luftës, ka një pjesë të rëndësishme brenda në këtë tunel. Sepse edhe vizitorët gjatë guidës shfaqin një interes të veçantë për të. Disa prej tyre janë të informuar që Gjirokastra është vendlindja e diktatorit, por u bën më tepër përshtypje mbrojtja për luftën e supozuar me Rusinë, gjë që çoi në bunkerizimin e Shqipërisë dhe në ndërtimin e këtij tuneli”.
Sot, ky muze vizitohet nga turistë nga mbarë bota.
“Është shumë i bukur. Nuk mund ta besoj çfarë historie! Shumë mbresëlënëse. Dua të shoh të gjitha dhomat apo qelitë, gjërat e ekspozuara këtu…”, shprehet një nga turistët.
Tuneli ka një gjatësi prej 800 metrash dhe në brendësi të tij ndodhen 59 dhoma.
n.s. / dita
