Një banakier dhe kamerier, që i shërbyen vrasësit dhe informatorëve, por edhe viktimës Ardian Nikulaj, ishin po aq te vlefshëm sa edhe teknologjia e kamerave dhe ADN-ja, për të orientuar hetuesit mbi dyshimet e tyre. Ata treguan për një klient të shqetësuar dhe që fliste anglisht dhe që më pas doli se ishte informatori, i cili sinjalizoi portugezin për të vrarë. Në fashikullin hetimor, përmendet se ditën kur u vra Nikulaj, kamerieri shpjegon se i kishte tërhequr vëmendjen një i huaj, i cili komunikonte anglisht dhe porosiste birra.
“Më bëri përshtypje pasi personi në fjalë kryente lëvizje të dyshimta dhe fliste në telefon dhe nuk ishte i qetë”, deklarojnë dy dëshmitarët okularë. Ky person i shqetësuar, që më pas u identifikua si Herry Simpson, dyshohet se njoftoi vrasësin Ruben Saraiva, i cili pas dështimit të tre vëzhguesve të mëparshëm, ia doli mbanë të jepte informacionin e duhur për biznesmenin politikan Ardian Nikulaj. Pas vrasjes së tij, portugezi Saraiva u largua me motor, kurse Simpson la në mes lojën e bilardos dhe pasi mori taksi, iku nga Shqipëria përmes aeroportit.
Edhe dëshmitari A.K., tregoi se si tre orë para krimit, portugezi që qarkullonte me motorin me targa të huaja, duke i ofruar 2 mijë lekë të reja, i kërkoi karburant duke i thënë “ten (dhjetë) lekë benzinë”. “E kuptova”, thotë dëshmitari, që donte 10 mijë lekë karburant benzinë dhe më pas i ktheva kusurin.
