Gjermania e ka arrestuar një oficer të agjencisë ushtarake të prokurimit, pasi dyshohet se i ka dhënë informacione të fshehta inteligjencës ruse. Njoftimi u bë me dije nga zyra e Prokurorisë Federale të Gjermanisë, e cila tha se ushtari Thomas H., i ishte afruar vazhdimisht konsullatës së Rusisë në Bon dhe Ambasadës në Berlin, nga maji dhe kishte shprehur gatishmëri për të bashkëpunuar me ta.
“Prokurori federal e ka arrestuar një oficer gjerman nën dyshimin se punon për një shërbim të huaj sekret. Urdhri i ditës është vigjilenca”, shkroi ministri i Drejtësisë i Gjermanisë, Marco Buschmann.
Gjermania është një nga vendet që i jep më së shumti pajisje ushtarake Ukrainës dhe që prej nisjes së luftës, sipas autoriteteve janë rritur operacionet ruse të spiunazhit. Zyra e prokurorit nuk ka dhënë hollësi të tjera. Ministria e Mbrojtjes e Gjermanisë nuk ka dashur të komentojë për këtë rast. Gati 12 mijë njerëz punojnë për agjencinë e prokurimit në Gjermani, në mesin e tyre edhe rreth 1.800 ushtarë. Në dhjetor, autoritetet e arrestuan një punëtor të Shërbimit të Jashtëm Sekret të Gjermanisë, i cili dyshohet se spiunonte për Rusinë.
