Gjykata e Posaçme dënoi me 12 vite burg, shoferin Nazif Ajrofskit, maqedonasin që u arrestua në vitin 2021, me ngarkesën 324 kg kokainë të kapur në Portin e Durrësit, në kamionin që drejtonte me destinacion Italinë.
Ajrofski nuk dha gjatë hetimeve dëshmi me interes për të zbërthyer organizatën e narkotrafikut, duke u shprehur se nuk kishte asnjë ide për ngarkesën e lëndës psikotrope të fshehur në mjet. Për shkak të gjykimit të shkurtuar, ai do të vuajë vetëm 8 vite burg.
Sasia e kokainës u kap në port në 18 qershor, të fshehur në serbatorin e kamionit që drejtohej nga Ajrofski.
Kokaina ishte e ndarë në 300 pako, të cilat ishin të stampuara me logo të ndryshme të firmave të njohura të shtëpive të modës, klubeve të futbollit apo imazhin e Whiskyt të famshëm brazilian.
Sasia e kokainës u kap në Portin e Durrësit. Kamioni me targa maqedonase është në sekuestro policore.
Sa i përket itinerarit të ndjekur, fillimisht u mendua se është nisur nga Belgjika, për të mbërritur në Serbi dhe më pas në Maqedoninë e Veriut, por burime zyrtare bënë me dije se kamioni hyri në territorin shqiptar përmes pikës kufitare të Qafë-Thanës, ku nga kontrolli në skaner rezultoi i pastër. Kjo ka rritur dyshimet e policisë se sasia e drogës mund të jetë mbushur në Shqipëri, ndërsa destinacioni final ishte Napoli, Itali.
