Gjykata e Durrësit ka lënë dje në burg pronarin e linjës së autobusëve Durrës-Milano, Mikel Pici dhe shoferin Piro Rushi, që u kapën në fundjavë me 13,7 kg heroinë në Portin e Durrësit. Ka qenë prokurori Madrid Kullolli që i ka akuzuar për prodhim dhe trafik të lëndëve narkotike Picin dhe shoferin e autobusit Rushi. Ai i ka kërkuar gjyqtarit të seancës Rexhep Bekteshi, “arrest me burg” për të dy. Kërkesa është pranuar nga gjykatësi.
Që të dy të arrestuarit, si në procesin hetimor paraprak dhe në sallën e gjyqit, nuk kanë dhënë asnjë deklaratë, por mbajtën qëndrime mohuese për akuzën. Në një moment kur janë pyetur nga gjyqtari për drogën e kapur në autobus, ata kanë deklaruar se ju qëndrojnë deklarimeve të mëparshme, ku kanë mohuar të kenë lidhje me trafik lëndësh narkotike. Në këtë moment ndërhyri prokurori Kullolli, i cili i tha gjyqtarit se ata nuk kanë deklaruar asgjë deri më tani, qëkurse u arrestuan nga policia. Operacioni ku u arrestuan dy personat u zhvillua në 30 prill. Lënda narkotike ishte fshehur në pjesën e sipërme metalike në mes të autobusit, ku ngarkohen bagazhet dhe ishte salduar në skajet e saj për të mos u dalluar.
Droga në 26 pako, u zbulua nga qentë e stërvitur, të cilët kanë nuhatur dhe zbuluar vendndodhjen duke bërë që të niste menjëherë prerja e pjesës metalike për të ushtruar kontrolle në strukturën e autobusit ku edhe u gjend lënda narkotike.
