Godina në qendër të Tiranës u legalizua si hotel, kush ishin dy vëllezërit që u kallëzuan nga e ëma

Dy vëllezërit, Elvis Turtulli dhe Endri Turtulli, pronën e babait që e kishte ndërtuar në 1995, e kanë deklaruar si ndërtim pa leje dhe kanë arritur që ta legalizojnë si një hotel.

Bëhet fjalë për një godinë 5 katëshe dhe 2 nën tokë në qendër të Tiranës, pranë Gjykatës së Lartë, mirëpo planin për të cilin në ndihmë u kanë ardhur edhe 7 punonjës të Kadastrës, ua ka shkatërruar mamaja e tyre. Ka qenë kjo e fundit që ka bërë kallëzimin duke treguar se godina është ndërtuar në 1995 dhe jo në 1998 siç patën deklaruar djemtë e saj dhe se ka qenë pajisur me certifikatë pronësie nga hipoteka në emër të ish-bashkëshortit, Beqir Turtulli.

Ky denoncim i saj ka shërbyer si pikënisje për nisjen e hetimeve, e ku në përfundim të tyre u bë e mundur pezullimi i 7 punonjësve të Kadastrës që tjetërsuan pronë në kundërshtim me ligjin teksa ndaj 2 vëllezërve është caktuar masa e sigurisë “detyrim paraqitje”.

Abuzimet në Kadastër po denoncohen edhe nga vetë kreu i saj Artan Lame, i cili ka nisur hartimin e një raporti për Kadastrat e çdo qyteti për të denoncuar shkeljet në 30 vite. Deri më tani, Lame ka denoncuar abuzimet në Kadastrën e Tiranës dhe atë të Durrësit, ku prokuroria ka nisur hetimet.

a.m/dita