Një superoperacion u finalizua rreth mesnatës së hënë, duke gdhirë e marta në kryeqytet. Policia e Tiranës dhe Sektori i Antidrogës ka arrestuar 5 persona dhe sekuestruar 10 mijë doza ekstazi.
Droga sintetike sapo kishte ardhur në kryeqytet dhe ishte destinuar për tregun e brendshëm.
Mësohet se nga 5 të arrestuarit, 3 janë Shqipëria dhe 2 të tjerë nga Kosova, kurse emrat e tyre pritet të publikohen në vijim, bashkë me detajet e operacionit. Dozat, thonë burime të policisë siguroheshin dhe vinin në vendin tonë nga Kosova.
Hetimet për finalizimin e operacionit kanë nisur 5 muaj më parë dhe është akoma në vijim. Dozat e lëndës narkotike mësohet se shiteshin kryesisht në zonën e ish- “Bllokut” dhe në lokalet e natës. Sipas përllogaritjeve, një dozë shitej deri në 30 euro dhe e gjithë sasia nëse do të hidhej në treg kapte vlerën e rreth 300 mijë euro.
