Nisja e sezonit turistik, sjell edhe qarkullimin e mjeteve lundruese ilegale. Një gomone 10 metra e gjatë u gjet e fshehur në një kamion të ngarkuar me jonxhë. Policia kishte informacione për mjetin lundrues që po transportohej në mënyrë ilegale dhe ndërhyri mbrëmjen vonë të së martës, ku u parkua kamioni në fshatin Babicë të Vlorës. Ndërhyrja u bë nga forcat Operacionale dhe “Shqiponja”, bashkë me Antitrafikun.
Lidhur me këtë rast u arrestuan dy persona të cilët ishin shpallur në kërkim ndërkombëtar dhe akuzohen për trafikim të mjeteve motorike dhe të agrikulturës. Në pranga kanë rënë Eduard Alikal dhe Feta Shametaj, të cilët rezultojnë me precedent penal edhe në Itali.
Ata janë arrestuar pasi gjykata italiane i ka dënuar për vjedhje me dhunë dhe aksioni ka qenë me qëllim ekstradimi, teksa do i bashkohet edhe dosja për gomonen në fjalë. Gjithashtu është sekuestruar edhe një eskavator. Është ndaluar ndërkohë pronari i objektit ku fshihej gomonia, me të cilën dyshohej se do të kryhej trafik.