Pothuajse 6 muaj që prej incidentit të 6 dhjetorit ku u qëllua me grusht Sali Berisha, ekspertiza mjeko-ligjore ka dalë në përfundime për gjendjen mendore të autorit.
Bëhet fjalë për Gerti Shehun, i cili në protestën e bërë nga Berisha, (në të njëjtën ditë që u mbajt edhe samiti i liderëve të BE-së në Tiranë) e goditi me grusht në fytyrë.
Sipas burimeve nga policia dhe prokuroria, pas ekspertizës, hetuesit kanë kërkuar shtrim në spitalin psikiatrik për Gerti Shehun. Sipas ekspertizës mjeko-ligjore, agresori i Berishës rezulton ‘jo i qëndrueshëm mendërisht’. Edhe më parë mjeku i tij kishte deklaruar se kishte lëshuar raport mjekësor dhe recetë me medikamente të forta për skizofreni agresive ndaj të dyshuarit, sepse kishte lëkundje të shpeshta humori dhe shenja të çrregullimit psikik.
