Erling Haaland është tashmë histori në Premier League dhe ylli që ka dominuar futbollin, duke lënë pas emra si Mbape, Messi apo dhe Ronaldo. Sulmuesi norvegjez i Manchester City ka thyer rekordin e golave në një sezon të vetëm në Angli, me 35 rrjeta në 31 ndeshje të luajtura. Njeriu rekord ka zbuluar sekretet e suksesit të tij bazuar në një dietë rigoroze prej 6000 kalorish në ditë.
Dhe suksesi i tij bazohet në një plan të rreptë stërvitor, që e perfeksionon trupin dhe aftësitë e tij fizike në maksimum. Sulmuesi maksimizon punën e tij jashtë fushës, për të performuar në nivelin më të mirë në fushë. Për ta arritur këtë, ai ndjek një dietë rigoroze me 6000 kalori në ditë, e cila ndihmon në mbajtjen e trupit të tij në shkallën e lartë, ndaj së cilës është i ekspozuar. Në fakt, një nga ritualet e lojtarit para ndeshjeve bazohet në ngrënien e ‘lasagna’ nga babai i tij, gjithashtu një legjendë e Manchester City. Sulmuesi tregon në dokumentarin e tij, se ushqimi vendas është gjëja më e rëndësishme në dietë, veçanërisht mishi, nga i cili lojtari përdor zemrën dhe mëlçinë.