Teksa ka publikuar pamjet nga Shërbimi i Kardiologjisë që ka nisur funksionimin në spitalin e ri të sëmundjeve të brendshme në QSUT, kryeministri Edi Rama bën me dije se është bërë e mundur edhe vendosja e aparaturave të teknologjisë së fundit, çka do të mundësojë shërbime më cilësore për pacientët.
Kreu i qeverisë shkruan në rrjetin social Facebook, se Shërbimi i Kardiologjisë është i pajisur me aparaturat e fjalës së fundit të teknologjisë dhe me kushte e standarde optimale.
“Mirëmëngjesi dhe me Shërbimin e Kardiologjisë, me aparatura të fjalës së fundit të teknologjisë, me kushte e standarde optimale, i cili ka nisur funksionimin në spitalin e ri ultramodern të sëmundjeve të brendshme në QSUT, mes befasisë së pacientëve dhe entuziazmit të ekipeve mjekësore, ju uroj një ditë të mbarë”, shkruan Rama.
Shërbimet e Kardiologji 1 dhe 2 janë transferuar së fundmi në Spitalin Qendror në QSUT. Kapacitetet e këtyre dy shërbimeve janë 116 shtretër.
Spitali Qendror ka kapacitet 345 shtretër dhe do të akomodohen 14 shërbime mjekësore spitalore të specializuara nga kardiologjia, nefrologjia, hematologjia, gastrohepatologjia, mjekësia interne, endokrinologjia, dermatologjia, reumatologjia, alergologjia, urgjenca dhe imazheria.
p.k\dita
