Hetimi në Itali, dëshmi shokuese: Vuçiç, ndër ‘turistët e horrorit’ që vrisnin me snajper civilët në Sarajevë?!

Avokati serb Çedomir Stojkoviç ka dhënë detaje për “Safarin e Snajperëve”, organizuar nga njësitë famëkeqe të kriminelëve serbë Radovan Karaxhiç dhe Ratko Mlladiç për “vrasje rekreative” në Sarajevë gjatë rrethimit në vitet 1992-96, për të cilat një prokuror italian ka nisur së fundmi hetimet.

Stojkoviç ka publikuar pamjet e Aleksandar Vuçiç nga ajo periudhë që tregojnë se ai mbante një pushkë ose snajper teksa po shëtiste kodrat nga ku gjuajtjet me snajper vranë civilë në Sarajevë.

Edhe Zika Helez, ministër i Mbrojtjes i Bosnje-Hercegovinës ka deklaruar vitin e kaluar se Vuçiç qëlloi civilët në Sarajevë me snajper.

Pavarësisht provave gjithnjë e më intensive, prokuroria publike në Beograd nuk nis hetime, edhe pse ky fakt i rëndë tanimë është në mediat botërore.  “Safari i Snajperëve” është një horror shokues. Vrasësit vinin në Beograd, e më pas  paramilitarë ose pjesëtarë të ushtrisë serbe  i shoqëronin në kodrat përreth Sarajevës, nga ku qëllonin “rekreativisht” njerëz me snajper, për një tarifë deri në 100.000 euro, – shkruan Stojkoviq.

Arma që Vuçiç po mban në krah në kodrat rreth Sarajevës në mënyrë të papërmbajtshme ngjan me versionet e pushkëve snajper që u përdorën në atë kohë – shton avokati i njohur serb.

Zyra e prokurorit publik në Milano ka hapur një hetim mbi “Safarin e Snajperëve” gjatë luftës në fillim të viteve 1990. Padia në Milano u paraqit nga gazetari Ezio Gavazzeni, i cili përshkruan një “gjueti njeriu” nga “njerëz shumë të pasur” me pasion për armët, të cilët “paguanin për të qenë në gjendje të vrisnin civilë të pambrojtur” nga pozicionet serbe në kodrat përreth Sarajevës.Sipas disa raporteve, për vrasjen e burrave, grave ose fëmijëve u ngarkuan tarifa të ndryshme.

Më shumë se 11 mijë njerëz vdiqën gjatë rrethimit brutal katërvjeçar të Sarajevës.

Akuza të ngjashme për “gjuetarë njerëzish” nga jashtë janë bërë disa herë gjatë viteve, por provat e mbledhura nga Gavazzeni, të cilat përfshijnë dëshminë e një oficeri të inteligjencës ushtarake boshnjake, tani po shqyrtohen nga prokurori italian i antiterrorizmit Alessandro Gobbis. Akuza është vrasje.

Gavazzeni filloi të gërmonte më tej dhe në shkurt u dorëzoi prokurorëve gjetjet e tij.

Në vitin 1992, shkrimtari dhe politikani nacionalist rus Eduard Limonov u filmua duke qëlluar disa herë në Sarajevë nga një mitraloz i rëndë. Ai po bënte një turne në pozicionet kodrinore i shoqëruar nga krimineli serb i Bosnjës Radovan Karaxhiç, i cili më vonë u dënua për gjenocid nga një gjykatë ndërkombëtare në Hagë.